A pustis de tres chida in zona ruja, sa Sardigna est pronta a cambiare colore.

Dae lunis amus a èssere colore de arantzu o grogu? Custu diat bòlere cumprèndere sa gente pro ischire cales ant a èssere is limitatziones de sa zona assignada, pro ite a segundu de sa classificatzione, is efetos pro s’economia isolana, giai dannificada, ant a èssere diversos.

S’ùrtimu faeddu ispetat a su ministru de sa Salude, Roberto Speranza, chi a su chi s’est cumpresu, est puntadu pro insertare sa Regione in zona arantzu.

Is datos de Istitutu Superiore de sa Sanidade sunt bonos meda, cun su Rt a 0,81 – tra is prus bàscios de Itàlia -, e fintzas is postos ocupados in terapia intensiva sunt meda prus pagos, gosi comente is epitzentros de ispàinu de Covid-19.

S’assessore regionale de sa Sanidade, Mario Nieddu est sollitzitende su ministru Speranza de fàghere passare sa Sardigna in zona groga, pro ite àteras duas chidas in custa fàscia diant a èssere graes meda pro is sardos. Forsis, cunsiderados is paràmetros positivos e un’arriscu minore, pro s’ìsula at a bastare una chida ebbia in zona arantzu.

Amus a bìdere, e isperamus chi sa detzisione siat custa pro ite sa gente est chesciosa e est incumintzende a calare in caminu, comente est sutzèdidu oe puru a Nùgoro e a Tortolì, acanta ant protestadu is butegheris.

In su capulogu barbaritzinu is cummertziantes, ant manifestadu cun cartellos e a boghes a suta de sa Prefetura, imbetzes in Ogiastra is butegheris si sunt postos in sa carrera manna de sa bidda in fila, unu fatu a s’àteru, poderende cun is manos un’acàpiu nieddu.

Sa situatzione est grave. Bastat pensare a is tzilleris e a is ristorantes chi podent fàghere servìtziu de asportu o cunsigna a domitzìliu ebbia. Pro custu calicunu at cungiadu s’atividade e is chi sunt poderende s’agatant in dificultade manna.

Ma medas àteras impresas puru sunt istadas postas in ghenugros dae is mesuras cunsighentes a sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Mundu est cambiende semper prus a lestru. Pro immoe sa gente est sighende a èssere conchistada de ispàtzios sotziales e aplicatziones chi podent causare dipendèntzia, pro ite cullunat a dd’as impreare meda.

Tzertu, comente totu is cosas, si custas retes sotziales benint impreadas pro bonu podent èssere unu modu nou de presentare is cosas, e pro calicunu podent èssere peri un’ocasione de traballu. Ma comente amus naradu custu non balet pro totus, duncas a is giòvanos diat cumbènnere a non si fàghere bisos meda.

Tocat a nàrrere puru chi est sutzedende unu fatu istranu meda: immoe paret chi in is ispàtzios sotziales at a èssere prus sighidas siat is foto e is istòrias de sa gente comuna chi non de cussa famada.

Su mèritu de custa moda est de TikTok, s’aplicatzione chi prima at conchistadu is giòvanos e a pustis est pràghida a ammachiadura a totus.

Custa rete sotziale diventada virale in totu su Mundu, est nàschida in Tzina in su 2016 e est arribada a su sutzessu mannu a pustis de s’istade de su 2018, ma in s’ùrtima iscuta de tempus Tick Tok est praghende prus de Twitter, Facebook e Instagram, is mèdios de comunicatzione de massivos prus mannos e contados finas a immoe.

Cale est su resurtadu? Sigomente a diferèntzia de is àteros ispàtzios sotziales faghet a pònnere vìdeos curtzos in ue sa gente si ponet a cantare, baddare o a istòrchere is iscenas de is film, medas “influencer” – gente chi diat a èssere capatza de cunditzionare su parre de su pùblicu – sunt sighidos semper prus pagu.

Immoe peri is persones disconnòschidas, gràtzias a TikTok, ponende unu ballu o una mòvida, podent fàghere milliones de visualitzatziones.

Bastat a pensare chi Khabane Lame, unu giòvanu de Chivasso – in provìntzia de Torino – chi est su “ticktoker” prus sighidu de s’Itàlia e tra is primos 100 de su mundu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”