A dolu mannu in custas chidas, pro more de s’andamentu de sa situatzione epidemiologica- at naradu su sìndigu Ennio Arba- amus dèpidu pigare detzisiones difìtziles, comente sa de suspèndere sas atividades iscolàsticas in presèntzia e sas atividades in sos esertzìtzios pùblicos acanta benint serbidos alimentos e cosa de bufare (tzilleris, ristorantes e pizzerias) finas a su 18 de santandria.

Custa mesuras chi amus pigadu sunt istadas netzessàrias pro more de tutelare sa salude de sos tzitadinos e pro parare fronte a s’ispàinu de s’infetzione.

In s’ora sunt istados fatos medas tampones lestros pro tratzare sos cuntatos istrintos de sos positivos, o sas persones chi aiant tentu sìntomos collegados a s’infetzione de Covid-19, chi ant permìtidu de agiudare s’USCA e s’ATS in s’òpera fundamentale de tratzamentu de sos casos positivos. Custu traballu de iscuadra nos at donadu sa possibilidade de agatare e de acorrare a sa lestra prus de trinta cuntzitadinos positivos (sintomàticos e nono) e, comente nos auguremus, de limitare àteras cundiduras.

Cuscientes de sas dificultades chi totus nois semus e amus a dèpere sighire a afrontare, bos torro gràtzias pro s’agiudu e pro sa responsabilidade dimustrada finas a oe, prus che totu cussos chi ant tentu dannos econòmicos dae sas ordinàntzias, ma comente si siat, tenent de prus a coro sa salude de sos orthulleinos e ant atzetadu una detzisione non fàtzile, ma netzessària.

Sos nùmeros de s’infetzione de coronavirus a Orthullè nos ant dimustradu comente custu virus siat frassu, comente si nche fichit in sas famìlias e comente s’ispàinet cun lestresa. Immoe prus de prima bos pedo de sighire a donare cura e de sighire a rispetare s’istesiamentu sotziale, sa sa proibitzione de s’atopare cun gente meda e s’òbligu de si pònnere sa mascaredda.

Bos racumando de rispetare custas règulas peri in sos raportos cun sos parentes e peri cun sos de domo si tenent problemas de salude, pro more de s’ispàinu de s’infetzione e pro tutelare sa populatzione prus dèbile. Bos fatzo a ischire in prus chi chenàbura colada sunt arribbados in comunu sos tampones lestros comporados dae s’amministratzione e chi chie bolet at a pòdere fàghere su controllu segundu sa modalidade chi semus detzidende paris cun sas autoridades sanitàrias, pro more de cumpletare su tratzamentu. Cantu prima bos apa a fàghere ischire comente ant a èssere fatos sos controllos.

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”