Su primu tzitadinu arthanesu Angelo Stochino, at informadu sa populatzone subra s’èsitu de su monitoràgiu a traessu de unu comunicadu ufitziale publicadu in primu pianu in su giassu ìnternet de su Comunu.

Oe in Àrthana, s’est concruidu su controllu pro pro su compudu de su contàgiu Covid-19 subra sa populatzione residente.
S’indàgine epidemiològica est istada realizada gràtzias a sa partetzipatzione voluntària de sa populatzione, chi at aderidu a muntone a s’initziativa. Su resurtadu de is 500 proas protzessados at donadu s’èsitu de 10 positividades, cun is persones interessadas chi sunt istadas mutidas in deretura e sutapostas a tampone molecolare pro cunfirmare sa positividade a su virus.
A fàghere ischire resurtadu de su monitoràgiu epidemiològicu est istadu su sìndigu Angelo Stochino, a traessu de unu comunicadu ufitziale.
Su primu tzitadinu at bòlidu sutaliniare is mèritos, ringratziende•ddos, de cussos chi ant permìtidu la resèssida de sa die.
At iscritu Stochino: “Deo e s’Amministratzione comunale espressamus satisfatzione manna. Ringratziamus pro s’impinnu e pro s’organizatzione: s’USCA, su Servìtziu de Igiene Pùblica presidida dae su Dot. Ugo Stochino, su comitadu de is voluntàrios mèdicos coordinadu dae su Dot. Rafaele Sestu, su servìtziu de Protetzione tzivile coordinadu dae su Dot. Marco Pinna, sa Rughe Ruja e os fortzas de s’òrdine coordinadas dae su Marisciallu Gianni Collaro. Intre is amministradores presentes su vitzesìndigu Marco Pinna, Fabrizio Deiana e Alberto Monni in calidade de responsàbile de is assòtzios e de is unidades de crisi contra su Covid. Bolimus ringratziare in fines totu is dipendentes comunales chi ant agiudadu pro realizare custu importante eventu, chi in tres dies ebbia ant istantargiadu un’organizatzione perfeta.”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”