Càmbiant is datas de su Fèstival de is Tacos 2020: sa rassigna cumintzat su 6 de austu (e non su 5 comente fiat prevìdidu) e si concruit su 10, in suta de su chelu isteddadu de sa note de Santu Larentzu.

Presentada a s’imprenta su 12 de làmpadas coladu, immoe sunt istados definidos fintzas is ùrtimos particulares de sa rassigna. Sa cumpangia de Cada Die Teatro est pronta a acollire su pùblicu tra is tacos ispantosos de Ogiastra in su respetu de is normas contra su Covid e duncas de sa salude de totus. A su pùblicu si pedit solu de agafare sa mascaredda; a fàghere ispassiare, emotzionare, riflètere e bisare nch’ant a pensare, comente a semper, is organizadores e is artistas in iscena.

Protagonistas de is ispetàculos de su sero, in s’ispàtziu a s’abertu de sa Cantina Antichi Poderi, Moni Ovadia, Andrea Pennacchi, Giuseppe Cederna, Max Paiella, Luca Radaelli e Alessandro Lay cun su suo Riva Luigi ’69 ’70 – Cagliari al dì dello scudetto.

Novidade de custa editzione nùmeru 21 ant a èssere is APUNTAMENTI DA FAVOLA, una genia de narratzione dedicada a is prus piticos. Is meres de domo afòrtiant galu de prus s’oferta cun un’atentu chi in is annos at crèschidu semper de prus, su ligàmene cun is pitzinnos e cun sa comunidade jersesu chi dae prus de binti annos acasàgiat su fèstival: «Una comunidade chi cun su colare de su tempus intendimus semper prus còmplitze pro unu teatru chi bivet de addòbios, sentidos e coladòrgios» sutalìniat su diretore artìsticu Giancarlo Biffi. Is pipios tra 4 e 11 annos (e is genitores issoro) chi disìgiant de èssere carrados in su mundu de sa fantasia, ant a pòdere assistire a is contos de is atores Silvestro Ziccardi e Francesca Pani in unu logu màgicu de su territòriu, mutende, durante su fèstival, a su nùmeru 328.3135034. Ant a èssere donados is inditos a pitzu de su logu e de s’oràriu chi ant a pòdere cambiare die cun die. Semper pro afortigare s’acàpiu cun su territòriu e is abitantes suos, s’at a pòdere assistire a is leturas literàrias cun protagonistas is autores de is libros e is atores dischentes jersesos de is seminàrios chi sa cumpangia contivigiat durante totu s’annu.

A mangianu ddoe ant èssere medas initziativas collaterales: su yoga in su padente de Sant’Antoni, s’apicurrada in is tacos, cunsiderados tra is prus amaliadores de Europa, is cursos de tessìngiu, sa cassa a su siddadu e is passigiadas tra is erbas ofitzinales, is percursos in bitzicleta e is bìsitas ghiadas a sa cantina Antichi Poderi.

Su Fèstival de is Tacos est sustentadu dae Comuna de Jersu, dae sa Cantina Sotziale Antichi Poderi, dae s’Assessoradu a sa Cultura e a su Turismu de sa Regione Sardigna, dae sa Fundatzione de Sardigna e dae su Mibact.

Sèdilo. Oramai non ddoe tenet prus peruna possibilidade chi s’Àrdia in ocasione de sa festa in onore de Santu Antine si potzat cùrrere, sa pròpiu cosa pro s’Àrdia a pee.

In su santuàriu dedicadu a s’imperadore, ocannu non s’at a intèndere su pista pista de is caddos sètzidos dae is cadderis balentes de Sèdilo.

Ddoe at èssere petzi tretu pro sa pregadoria, cun trèighi missas prevìdidas, tra su chimbe e su sete de mese de argiolas.

Comente giai istabilidu in sa metade de su mese de maju coladu, unu de sos rituales prus famados de s’Ìsula at a bènnere burradu.

Su primu a dare sa notìtzia fiat istadu su preìderu de Sèdilo, Don Battistino Mongili, durante sa missa in onore de Santu Sidoru.

Mancari mancarent prus pagu de duos meses si fiat detzìdidu de non fàghere calare is caddos e curridores a pee dae su cùcuru de Su Frontigheddu, a càusa de s’intzertesa ligada a s’apretu sanitàriu.

Una delusione manna pro is sedilesos e pro is fideles, chi non at a pòdere fàghere sa festa prus importante de sa bidda, chi annu atzocat mìgias de istràngios.

Is ùrtimos faeddos de su prefetu Giusi Stellino at cunfirmadu sa detzisione mala, sena peruna possibilidade de cambiare idea.

Non mancant però is polèmicas e is crìticas: in medas narant ca si si podet fàghere sa festa religiosa, si diat àere pòdidu sarbare fintzas s’Àrdia.

Non si cumprendet pro ite s’Àrdia, mancari siat una tzelebratzione religiosa, essende cunsiderada dinàmica, non fatzat a dda fàghere. Difatis est cunsentidu s’acumprimentu de is funtzionas istàticas ebbia, segundu s’interpretatzione de is disponimentos fatu dae sas autoridades cumpetentes. Ma in medas sutalìniant, chi custa iscrezeniadura diat èssere superada dae sa tzirculare ministeriale de su 13 de làmpadas.

Difatis sa base de sa cuntestatzione diat èssere sa detzisione pigada dae prefetura, cuestura e diòtzesi, chi ant disciplinadu sa manifestatzione, rispetende sa normativa contra su COVID-19.

Àteru motivu de pelea tra sa populatzione e s’autoridade, est sa detzisione chi a is professones ant a pòdere partetzipare isceti su sìndigu e su pàrracu de Sèdilo.

Però, comente medas faghent osservare, in sa tzirculare ministeriale de su 13 làmpadas, non diat èssere presente niunu vìnculu in sa partetzipatzione de fideles, cadderis e caddos.

Abarrat sa duda si, istudiende determinadas modalidades, diat èssere istadu possìbile sarvare s’Àrdia. A ogna contu, no est prus possìbile fàghere nudda pro custu rituale, bidu chi mancant pagas dies a sa Festa de Santu Antine.