Fortza Paris at postu in is manos de una fèmina sa responsabilidade de ghiare su partidu in s’organizatzione sua in Ogliastra pro more de abrontare is eletziones regionales de su 2019.

Mirella Depau, de Irbono e residente Tortoli, laureada in biologia e chi esèrtzitat sa professione in su setore de sa seguridade e de s’igiene alimentare, est istada nominada coordinadora de Fortza Paris in Ogliastra.

Cun sa nòmina de Mirella Depau,  Fortza Paris bantat immoes duas fèminas a sa ghia de su partidu in Nùgoro e in Ogliastra.

«Tzertos chi cun s’aportu issoro podimus contribuire a unu benente chi donget rispostas  a is aspetativas de is sardos de cussos territòrios. Bonu traballu e gràtzias a is ogiastrinos pro sa fidùtzia chi nos auguramos nos potzant cuntzèdere. Fortza Paris  Ozastra bella de Sardinnia» cummentat in una nota istampa su presidente natzionale Gianfranco Scalas.

Primas mesuras de accottu approadas pustis de su mumujone Harry:istantziados 10 milione de euros.

Sa Regione at approadu sos indiritzios attuativos po sas primas mesuras de accottu lestru a sos tzittadinos e dittas corpados dae sa colada de su mumujone Harry, cun d’una summa po incumintzare de 10 miliones de euros. Su provvidimentu istabilit siat s’ispartidura de sos contribbudos lestros siat su contu de sos dannos, chi at a serbire po atteros interventos de accottu.

Sas attividades de sa laurantza, de pesadura e de sa pisca ant essere azzuadas pius a daenanti. Su documentu approadu, ponet impare sas proceduras tennicas amministrativas in tottu s’iscrocca de sa regione, garantinde tempos lestros de ispartidura e coerentzia de s’assione amministrativa. Sos Comunes chi sunt bistados seperados dae su pregone de su capu de sa Divisione de sa Protessione Tzivile podent avviare sos protzedimentos po cuntzedere sos contribbudos, sighinde sos indiritzios approados e amministrare sa regorta e s’istruttoria de sas dimandas po mesu de su Sistema Informativu de Protessione Tzivile.

Benefissarios de sos contribbudos sunt sos privados o merese de benes avariados, incluidinde domos, benes mobiles e benes mobiles registrados, e fintzas attividades accolomicas e de produssione chi ant tentu dannos a sas cosas chi ammos appena mentovadu azzunghindebi mertzes, cosas chi non sunt ancora finidas o giai finidas. Non bi sunt in s’accottu sos dannos ligados a su mancadu balanzu. A su mamentu, sas attividades de laurantza e de sa pisca non podent presentare sa dimanda, pro itte si isettant sas mesuras dedicadas chi permittant de garantire su massimu de s’azzudu possibile, semper intro de sos marghines de sos azzudos de Istadu.

Sa prima parte de 10 miliones de euros po su bilanciu regionale 2025-2027 at a podere essere unida cun attera dinari si at a serbire. Custu interventu, mancari siat solu su primu passu, est unu sinzale beru de sa volontade de accottare a sa lestra chie at tentu dannos graes, evidentziande s’importantzia de un’assione lestra e cordinada po minimare sos dannos de sos bisestros naturales e tutelare sa resilientzia de sas comunidades e accolomias locales. Unu nuntzu bonu po chie at veramente bividu cun isprammu sos dannos de su tempus malu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22