Casteddu, 1 de nadale 2019. S’isposu prus bellu de Itàlia?

Est su chi bestit sa bestimenta traditzionale sarda torrada a manigiare in modu elegante.

E est sarda fintzas sa mègius trucadora de isposas de Itàlia.

Est istadu unu trìunfu mannu pro is cuncorrentes isolanos in sa Note de is Oscar de is matrimònios italianos.

Sa butega de maistru de pannu Modolo de Orane e Valeria Boncoraglio ant bintu su primu prèmiu in sa Special Night de s’Italian Wedding Awards 2019, su cuncursu chi incoronat is mègius professionistas italianos in s’organizatzione de cojas a livellu natzionale, de pare a pare pro is categorias Àbidos de Isposu e Make Up Artist.

Su reconnoschimentu importante est istadu intregadu eris sero in s’imponente Capella de Santa Uberto, òpera maistra de s’architetura baroca de sa Règia de Venaria de Torinu, dae in antis a is mègius etzellèntzias de su mundu de su Wedding natzionale e internatzionale e a is primores de su Made in Italy, arribbados in finale a pustis de àere coladu is cualificatziones a is semifinales regionales.

S’Italian Wedding Awards est una bera note de is Oscar intregada a s’elegàntzia, a su gustu fine, a is sabores e a is nuscos chi caraterizant su mundu meravigiosu acapiadu a sa die prus romàntica de sa vida.

Un’invitu pro is siendas de su setore de su matrimòniu a crèschere sa creatividade e sa professionalidade issoro e a promòvere su “Wedding in Italy”.«Semus bregiosos a beru. Sa Sardigna aiat retzidu unu prèmiu giai s’annu coladu e ocannu is binchidores sunt duos.

Duncas semus creschende», ant naradu Alessia Ghisoni e Cinzia Murgia, organizadoras de eventos de sa sotziedade casteddaja Oggi Sposi & Exclusive Wedding, ùnicas referentes pro sa regione Sardigna de s’Italian Wedding Awards, «amus a sighire a traballare a manera chi custos reconnoschimentos siant semper de prus. Pro sa Sardigna tenimus unu progetu de internatzionalizatzione acapiadu a s’organiztzione de cojòngios e a su turismu de is cojas. Pro ite creimus in sa terra nostra e in is oportunidades chi custa terra donat.

E pro ite sunt galu medas is potentzialidades chi s’ìsula nostra devet avalorare pro otènnere prus visibilidade a livellu internatzionale”.

Una bona resèssida duncas pro is professionistas sardos binchidores; duos nùmenes afirmados de livellu artu a beru in su panorama internatzionale e connotos meda. Cun is bestimentas traditzionales suas in istile ètnicu torradas a manigiare in modu elegante, sa butega Modolo est famada meda. Est connota in totue e sa fama sua at giumpadu is làcanas natzionales esportende in totu su mundu unu modellu sena tempus basadu subra sa passione pro s’arte sartoriale e in su respetu de is raighinas e de s’identidade de su logu. Est nòdida pro sa traballadura de su velludu, pro su sestu de sa beste traditzionale ispirada a su tràgiu clàssicu de is pastores barbaritzinos. Is maistros de pannu de Orane (provìntzia de Nùgoro) ant bestidu e bestint personàgios importantes comente Francesco Cossiga, Vittorio Sgarbi e Sergio D’Antoni.

Valeria Boncoraglio, trucadora indipendente de S’Alighera, formada in s’iscola de trucu de Chanel e Lancôme paris cun professionistas de fama internatzionale, at imbentadu sa marca “Make up in Vetrina” in ue is modellas, in un’ispètzia de ispetàculu, benint trucadas dae in antis a su pùblicu. Is bestires de isposa suos sunt essidos in is importantes rivistas internatzionales comente Vogue Sposa, Cosmopolitan e Idea Sposa. In s’istade Valeria Boncoraglio tràmudat a Costa Smeralda acanta su pilucheri de s’Hotel Romazzino de Porto Cervo, in ue trucat is printzipessas e is fèminas prus galanas de s’arta sotziedade mundiale.

A seberare is candidados ddoe sunt giùighes internatzionales espertos e is prus numenados organizadores de cojas de totu su mundu. Tra issos Elizabeth Solaru de sa famada Elizabeth’s Cake Emporium, sa mègius durchera pro turtas de matrimòniu de Londra, s’istilista irlandesu mannu Ray Lowbridge e is responsàbiles de su DWP congress de Dubai, chi prèmiat is mègius professionalidades de su setore de is cojas in su mundu.

Unu pagu de Sardigna fintzas in su condusimentu de sa serada afidada a s’aligeresu Anthony Peth, cara connota de sa televisione e condusidore de programmas televisivos in is canales Rai e La 7. A pustis de sa premiatzione, su Royal Gala Dinner party at amaliadu su pùbblicu presente in sa Règia, pro s’ocasione allichidida cun lughes, frores e mobìlia in istile imperu. Unu menù a posta pro s’eventu at contribuidu a torrare a abbivare is antigos aposentos lussuosos de su Palatzu Reale, fintzas gràtzias a sonadores e figurantes cun costùmenes de època chi ant istentadu is istràngios cun esibitziones ispantosas.

S’eventu est una vetrina istratègica pro sa Sardigna comente meta bramada de su “destination wedding”. Su turismu de is matrimònios difatis donat a s’Ìsula oportunidades istravanadas pro sa crèschida de istagionalidades noas e pro s’isvilupu de un’ oferta autònoma e cumplementare respetu a cussa de su turismu balneàriu. Sa Sardigna, cun is marinas atzisadoras suas e is ungrones suos ricos de istòria e cultura, ofrit una meca de ambientatziones romànticas e esclusivas pro chie chircat s’iscenàriu ideale pro sa die prus bella de sa vida.

E in s’Ìsula medas impresas si sunt movende  pro rispòndere a is rechestas de unu mercadu in crèschida e semper de prus a sa busca de logos ispetziales e ùnicos.

Is referentes de sa regione Sardigna pro s’Itàlia Wedding Awards sunt istadas peri ocannu Alessia Ghisoni e Cinzia Murgia fundadoras, organizadoras, designers e diretoras artìsticas de sa sotziedade casteddaja Oggi Sposi & Exclusive Wedding. Primas imprendidoras a àere batidu sa “wedding experience” in Sardigna, Alessia e Cinzia ant tentu sa bona pensada de propònnere is isposòrios in is areniles de s’Ìsula e de propònnere su turismu de is matrimònios, regalende fama e prestìgiu a tretos chi a in antis de tando nemos aiat pensadu de impreare comente logu ideale pro nàrrere sa frase fatìdica “Eja, ddu bògio”.

Su decretu Energia a unu passu dae su emmo  allisat sa carrela a s’imbestida de su bentu; Sardigna chentza amparu.

Su decretu Energia est accanta a s’approazione deffinitiva. Pustis de su via libera de su Senadu, su provvidimentu at arribare in pagu tempus a
sa Camera po s’urtimu passazzu de su parlamentu chi at a cussentire s’approazione. Unu camminu chi est faghinde preoccupare meda sa Sardigna
inube creschet sa timoria de un’accreschimentu chentza controllu de sos impiantos de su sole e de su bentu, chentza chi bi siant tutellas po s’iscrocca.

Su decretu, naschidu po apprettare sa colada energetica e minimare sa dipedentzia dae su fossile benit bidu commente un’istrumentu chi minimat su rolu de sas Regiones e de sos entes locales favoressinde Operadores Energeticos mannos natzionales e internatzionales. Sa Sardigna, gratzias a sas calidades de s’ambiente e de su tempus benit cussiderada una de sas iscroccas prus disizzadas po imbestimentos novos e propriu po custu arriscat de tennere sos problemas prus mannos.

Sas regulas novas prevedint protzeduras prus fatziles po s’autorissasione e una minimada de sos controllos locales. Custu diat podere cussentire sa fraigada de impiantos fintzas in logos cun balore mannu de sa bista de sa laurantza cun effettos devastantes supra s’iscrocca e sas comunidades.

In custu cuntestu si affortigat s’impignu de comitados tzivicos, amministradores locales e assotzios chi dimandant istrumentos de amparu prus balidos. A su tzentru de sa dibatta bi est sa proposta de una lezze regionale Pratobello chi puntat a introduire lacanas craras e criterios chi istringhent de prus po fraigare impiantos po su sole e su bentu in s’Isula.

In sas dies imbenientes cun s’accostiare de su votu a sa Camera si prevedint initziativas novas e protestas pubbricas. Su cunfrontu si giogat intre s’esigentzia natzionale de apprettare sa transizione energetica e sa dimanda de prevedire unu disignu chi tenzat contu de sa particularidade de sa Sardigna e de sa tutella de su patrimoniu naturale e culturale suo.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22