«Su Nadale est un’ocasione de festa pro is famìlias ma fintzas pro su cummèrtziu. Cun custa manifestatzione, ma fintzas cun àteras chi sunt giai in programa, tenimus s’obietivu de agiuare su cummèrtziu e de sustentare e isvilupare su setore econòmicu», at ispiegadu s’assessore Alessandro Frongia.

Fintzas in su 2019 si rinnovat difatis s’apuntamentu cun is Mercatinos de Nadale chi, dae su 1 de mese de idas finas a su 6 de Ghennàrgiu 2020, ant a èssere presentes in su tzentru de Casteddu, abertos dae is 10 de mangianu finas a is 22.

81 is domigheddas in linna presentes e chi ant a acasagiare in totu 86 esposidores, custos ùrtimos diferentziados dae tres diversos colores a segunda de sa categoria: 32 de colore ruju chi si referint a is produtos alimentares, 26 de creatziones artesanales e artìsticas cun su colore grogu, 28 cummertziantes cun su colore birde. Tra is artìculos in bèndida prodùidos enogastronòmicos de vàriu tipu, ma no ant a mancare peri is decoratziones pro s’àrbore de Nadale o pro su naschimentu, finas a is creatziones fatas a manu dae artisanos e hobbistas, chi ant a propònnere cuadros, prendas e isculturas in linna.

In prus de su Cursu, Pratza Yenne e Pratza de su Carmine, ant a èssere interessados fintzas àteros bighinados: sa Marina at a promòvere initziativas e eventos itinerantes, paris cun bia Garibaldi e bia Manno. Novidade de ocannu est sa presèntzia de unu pianoforte chi at a èssere postu in manera istàbile in Pratza Yenne e chi at èssere sonadu ogni bia dae diversos mùsicos. Pretziosa fintzas sa partetzipatzione de su Cunservatòriu de Casteddu: istudiantes e ex istudiantes s’ant a mustrare in cuntzertos de mùsica clàssica e jazz. A is prus piticos nche ant a pensare imbetzes is Superanimadore e àteros animales de cumpangia, chi ant a isfilare in sa “Xmas cartoon parade” in versione Disney e non solu, in is dies de su 7, 13 e 17 de mese de idas.

Importante fintzas s’anteprima de is Mercatinos su 28 e 29 onniasantu, cun sa novidade “Càalici di Natale” a cumentzare dae is 18.30, durante sa cale is domigheddas in linna de su Cursu ant a acasagiare is cantinas sardas. Is costos pro la resèssida de s’eventu sunt de prus a mancu 220 mìgia èuros, postos a disponimentu dae is medas assòtzios de privados e cummertziantes chi ant dadu vida a sa manifestatzione, comente semper promòvida dae su Comunu de Casteddu.

«Su traballu tra s’amministratzione e is assòtzios interessados est unu resurtadu importante dae su puntu de bista de sa temàtica ambientale» at cummentadu s’assessore a s’ambiente Guarracino, «nche tenimus a nàrrere chi custu est un’eventu chi si proponet fintzas in una beste ecològica, ca unu de is aspetos de cabbale de su progetu est chi is package chi pertocant is artìculos ant a èssere totus cumpostàbiles o comente si siat retziclàbiles».

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22