Pro nche bogare s’annu betzu e saludare s’annu nou, in Lanuséi no at a èssere possìbile a fàghere sa traditzionale fogaria de coa de annu, òrdine de su sìndigu Davide Burchi, chi at adotadu unas cantas mesuras pro garantire sa seguresa de is tzitadinos.

In particulare, con ordinàntzia n. 47 de su 27 de mese de idas est istadu dispostu ca a cumentzare dae is 9 de note de su 31 de mese de idas 2018 , finas a is 8 de su primu de ghennàrgiu 2019, in totu su territòriu comunale de Lanusèi, non s’at a pòdere girare cun ampuddas de cristallu, bòtolos de allumìniu e latinas.

In prus, is butegas no ant a pòdere bèndere a sa clientella su bufòngiu in ampuddas de bidru, francu chi sa cosa de bufare siat betada a tassas e bufada in intre de sa locale etotu . Est permìtidu a bèndere su bufòngiu in ampuddas de cristallu o in latina pro nde ddu leare a domu, ma petzi chi is botos siant bene serrados e sigillados.

Ancora, si subenit a totus ca s’ordinàntzia n. 37 de su 28 de mese de idas, disponet, pro totu is festas de Paschighedda, de Annu Nou, e de is Tres Rès– est a nàrrire dae su 23 de mese de idas finas a su 6 de ghennàrgiu – ca in totu su territòriu comunale de Lanusèi non s’at a pòdere isparare a fosile o a pistola e in prus est vietadu su possedimentu e s’alluimentu de fogos de artifìtziu, de coetos, de patarros, de bombetas e minervas o de àteros impriastos pirotècnicos. S’amministratzione Comunale de Lanusèi, àugurat a totus bonas fines e mègius printzìpios.

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22