S’atividade de sa Politzia de Istadu ispiegada cun is disinnos de dòighi fumetistas famados. Custas ant a èssere is figuras chi ant a rapresentare is meses de su 2019 in su calendàriu nou de sa Politzia de Istadu.

Dae su 2001 su ricavu de su calendàriu de sa Politzia de Istadu benit intregadu a s’ UNICEF pro finantziare unas cantas emergèntzias umanitàrias; s’annu caladu sa bèndida de is calendàrios de sa Politzia de Istadu at permìtidu de  donare 117.000 èuros  a su  progetu UNICEF “Italia – Emergenza bambini migranti”.

Ocannu su ricavadu de sa bèndida at a èssere destinadu a su sustennu de su progetu “Yemen”, teatru de una de is crisis umanitàrias prus malas de su mundu, in ue prus de 22.2 miliones de persones tenent bisòngiu in deretura de assistèntzia. S’UNICEF si ponet comente punna de agiudare 17.3 miliones de persones, de custas 9.9 miliones pipios,  cun interventos chi permitant  s’atzessibilidade segura a s’abba, sa prevenzione e sa cura de is maladias mortales prus fitianas e su suportu psicosotziale a is pipios e a is pitzocheddos pro mèdiu de percursos educativos.
Ocannu puru una parte de su ricavadu dae is bèndidas de su calendàriu at a èssere donadu dae su Comitadu Italianu pro s’Unicef a su Fundu de Assistèntzia pro su personale de sa Politzia de Istadu.

Si podet prenotare su calendàriu de muru (costu 8 èuros) e su calendàriu de mesa (8 èuros) intro su 24 de cabudanni  fatu a su versamentu in su contu currente postale nr. 745000, intestadu a “Comitato Italiano per l’Unicef”. In su bulletinu est a inditare sa causale “Calendario della Polizia di Stato 2019 per il progetto Unicef “Yemen”.

Poi si depet presentare sa retzida de su versamentu a s’U.R.P. (Ufìtziu Relatziones cun su Pùbblicu) de sa Cuestura de Nùgoro (0784/214191) chi at a donare totu is inditos pro s’intregu de su calendàriu.

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”