Sa dotora Marilena Lara a pustis de 41 annos de traballu lassat s’atividade ambulatoriale chi dd’at bìdida assìstere bona parte de is tzitadinos tortoliesos. Cun una lìtera saludat is assistidos suos.

Comùnicat a is assistidos suos custa noa cun una lìtera tocante indiritzada a totus is famìlias  chi in is annos at assistidu, ghiadu e pro is cales tenet un’istima manna. At a sighire sa faina sua  de ispetzialista in Geriatria, in Dietologia e comente Mèdicu Tzertificadore pro su cunsighimentu e rinnovu de is patente.

Custa sa lìtera de sa dot.ssa Lara: «Assistidas e Assistidos istimados, fiat su 22/12/1977 cando m’aiant assignadu sa segunda cunduta mèdica de Tortolì. In custu percursu de esistèntzia duradu 41 annos est arribbadu su momentu de dèpere cambiare custu caminu. Su 21 cabudanni sa cunventzione cun s’A.S.L. comente Dutora de Meighina Generale, iscadit. Dia àere disigiadu postitzipare custu momentu ma non m’est istadu cuntzèdidu. Ispero de èssere istada pro bois unu puntu de riferimentu, de bos àere ischidu iscurtare, cumprèndere e èssere istada in medas ocasiones una figura familiare, interessada a is problemas bostros e a bortas de is brègios e de is satisfatziones bostras.

Su tretu acumpridu paris est istadu pro mene istrutivu, meda importante e de profetu. Cun grandu cummotzione e  tristesa bos depo saludare. S’ambulatòriu meu restat abertu pro sa prosighimentu de su traballu miu de ispetzialista in Geriatria, in Dietologia e comente a Mèdicu Tzertificadore pro cunsighimentu e rinnovu de is patentes patente.

Apo a èssere comente si siat a disponimentu de totus, poderende su fidòtziu chi m’ais donadu, e pro chie dd’at a chèrrere, so semper bronta a donare cussìgios, agiudos e indicos. So fiera de èssere istada su mèdicu bostru e bos bògio torrare gràtzias pro sa fide chi ais tènnidu in mene.
Dr. Marilena Lara».

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22