Primu passu a dae in antis pro sa ricualificatzione de su Cursu Umberto. Finatziadu dae sa Regione Autònoma de Sardigna su programma integradu de su tzentru istòricu de Tortolì, cramandu Atobiu (acrònimu de Arbatassa, Tortolì e su faeddu in sardu “biu”).

Aprovadu dae su consìgiu comunale su 21 de mese de idas 2015, fatu pro mèdiu de s’Assessoradu a is Traballos Pùbblicos, su progetu est su resurtadu su primu in graduatòria cun unu finantziamentu de 264 mìgia èuros: de is cales 106 mìgia pro òpera pùbblicas e su chi cògiat, comente prevìdidu dae su bandu, destinada a privados pro su recùperu de fràigos chi s’agatant in su tzentu antigu de sa bidda.

Unìinterventu bòfidu meda dae s’Amministratzione Comunale, una noa bona pro su Sìndigu e pro totu sa magioràntzia su finantziamentu de unu progetu chi giughet sa punna de donare una risposta a is esigèntzias de is tzitadinos e de is cummertziantes.

Su progetu previdit su miglioru de sa viabilidade, sa ponidura de su sartziadu in su tretu de sa Pratza Roma finas a sa grugiada cun bia Cagliari e Cairoli, s’isciùsciu de is barriereas architetònicas, interventos pro is sutaservìtzios, s’illuminatzione noa e una cartellonìstica noa.

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22