Sa moneda virtuale sarda sighet a currere estra conca a su 2018 cun s’obietivu de unu rècord nou: pro Sardex su 2016 si fiat cungiadu cun 67 milliones de crentias (un’èuru pro crentia). E como su sorpassu est belle fatu: 66 milliones a fine santugaine, e b’at galu àncoras duos mese. Nùmeros in crèschida, duncas. Su bilantzu de Sardex SpA a su 31 de mese de idas 2016 est istadu de 2,8 milliones de èuros cun una crèschida cunforntu a s’annu pretzedente, sende chi su bilantzu 2015 si fiat cungiadu a cuota 2,3 milliones de èuros.

Sardex tenet 50 dipendentes. Custu s’organigramma: presidente Carlo Mannoni (Fundatzione de Sardigna), amministradore delegadu Gabriele Littera, diretore cumertziale Piero Sanna, diretore generale Franco Contu. Cumponentes cussìgiu de amministratzione: Grazia Borri (Banca Sella holding), Ciru Spedaliere (Invitalia Ventures), Stefano Molino (Innogest SGR SpA).

Sardex a oe est una retza de impresas e de professionistas chi in sa sola ìsula contat belle 4 mila aderentes. Operativu in s’ìsula dae su 2010, in sete annos de fainas su Tzicuitu de crentia cumertziale at creschidu in manera contina de annu in annu siat pro nùmeru de iscritos siat pto nùmeru de “transatziones”. Fiant 14 milliones in su 2013. Divenidos posca 29 in su 2014, 49 in su 2015, 67 in su 2016.

Su modellu, naschidu in Sardigna in su 2010, est istadu propostu cun sutzessu in àteras 11 regiones italianas (Piemonte, Badde de Aosta, Lombardia, Vènetu, Emìlia-Romagna, Marche, Umbria, Lazio, Campània, Abrutzu, Molise-Sannio). Custos tzicuitos de crentia cumertziale in totale tenent belle 5 mìgia iscritos. Una màchina chi non si firmat duncas: Sardex in custos annos at isvilupadu s’atividade sua tenende comente riferimentu sas Pmi e sos professionistas.

Ma sa punna sua est da de allargare su campu de atzione. Nessi in duas diretziones. Prima, sunt ativos e in fase avantzada sos progetos cun sa pùblica amministratzione. Segunda, est prevìdida s’abertura de su tzicuitu a sos consumadores. Unu campu de atzione semper prus ampru: si chircant collaboradores locales noos pro aviare sos tzicuitos in sas regiones como iscobertas. Un’ operatzione chi si deper concruire in su giru de duos annos.

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22