Tragèdia in sas istradas de s’Ogiastra custa note a inghìriu a sas tres, in ue Paola Crabas, pitzoca de 22 annos, est abbarrada morta. Sa giòvana fiat ghiende una Fiat 600 chi pro motivos àncorat de atzertare nch’est acabbada a pitzu de un’Opel Astra cun in intro tres giòvanos de Àrthana.

S’intzidente est acontèssidu tra Gelisuli e Tortuelie a s’artària de su distribudore de benzina. Sos tres artzanesos, Silvio Loi (24 annos, originàriu de Àrthana ma residente in Gelisuli), Nicolò Piras (27 annos) e Valentino Piras (25 annos) sunt istados leados in còdighe ruju a s’ispidale Nostra Sennora de sa Mercede de Lanusè.

a su logu de s’intzidente sunt lòmpidos is agentes de sa Politzia Istradale de Lanusè chi ant fatu totu sos rilievos de ritu, s’Anas, sos Vìgiles de su Fogu de Tortuelie e sos Carabineris chi si sunt ocupados de sa viabilidade. Sa dinàmica est galu totu de atzertare.

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22