Cras, giòvia 11, e chenàbura 12 de maju, in Valencia sa sede de s’Etra Investigación y Desarrollo (ente ispagnolu moderadore) acasàgiat s’atopu de inghitzu de su progetu Europeu Lets Crowd. Su progetu interessat unu tema meda atuale: s’amparu de sas persones dae atacos terrorìsticos, fintzas de sìngulos indivìduos, durante sas manifestatziones de massa.

Tra sos partners de s’ambitziosu progetu Europeu Lets Crowd, tiradu a compudu e preventzione de cumportamentos anòmalos durante atopos de massa, b’ant fintzas su Pra Lab (Diee, dipartimentu ingegneria elètrica e eletrònica, Universidade de Casteddu) e Pluribus One (Unica spin off). S’ateneu de Casteddu at a tènnere unu ruolu crae de su progetu, partetzipende pro mèdiu de duas unidades de chirca. Su laboratòriu Pra Lab s’at a ocupare de isvilupu de trastos de videbardania intelligente e de su protzessamentu semu-automàticu de immàgines in gradu de compidare e rilevare cumportamentos anòmalos in atopos pùblicos. Annotamala, at a dare balore agiuntu a sa “Computer vision for crowd protection – Intellingenza artificiale e visione mediata dalle macchine nella protezione delle folle” e at a tènnere su cumando in sa pianificatzione de s’istrategia de comunicatzione e de su work package dedicadu a s’ispainamentu e a s’isfrutamentu de sos resurtados de chirca.

Cun su Pra Lab de s’iscuadra de professore Roli, cooperat fintzas su spin off universitària Pluribus One. Su spin off at a aprofundire sos aspetos de su progetu currelados a cybercrime e cyberattacks, ocupende·si de anàlisi e isvilupu de casos de impreu de su toolkit propostu dae Lefts Crowd, ativende cumponentes sofisticados pro un’avantzadu motore de anàlisi semàntica postu a disponimentu de unu de sos partners de su cunsòrtziu.

A pustis de sos atacos reghentes cun autoveìculos a Nitza e in àteros logos, su progetu tratat un’àmbitu delicadu meda. Sa Cummissione Europea est atenta meda a s’isvilupu de sos traballos, subra sos cales in sos tres annos chi ant a bènnere sa visibilidade, fintzas mediàtica, at a èssere meda arta. Fintzas pro custu sa presèntzia de su Pra Lab (in prus de a Roli, Giorgio Fumera, Davide Ariu, Matteo Mauri) e de su spin off Pluribus One est motivu de orgòlliu pro s’ateneu de su cabulogu. Lets Crowd (Law enforcement agencies human factor methods and toolkit for the security and protection of Crowds in mass gatherings) est finantziadu dae sa Cummissione Europea, in intro de su programma Horizon 2020, cun belle tres milliones de èuros.

Unu disafiu de intelligence cumpartzida e de suportu cuncretu pro s’atuatzione de su Modellu de seguridade europeu (Esm) pro sos atopos de massa. Cun unu suportu a sos professionistas de polìticas de seguridade e a sas fortzas de s’òrdine.

Casteddu e sa Chida Europea de sa Mobilidade de su 2025.

Casteddu s’est aprontande a fàghere sa Chida Europea de sa Mobilidade de su 2025, chi at a èssere dae su 16 a su 22 de Capidanni. B’at àere eventos meda, cun sa punna de interessare sa zente de s’imbeniente de sa tzitade e de su benèssere de sos tzitadinos suos. Custa Chida Europea at su finis de sensibilizare sa zente casteddaja po cantu pertocat sos trasportos sostenìbiles e sa calidade de sa vida in sa tzitade. B’at àere, infatis, atopos, chistionadas e fainas po òmines e fèminas de calesisiat edade.

S’at a comintzare su 16 de capidanni in sa MEM, inube s’at a fàghere una bella chistionada subra de sas mòvidas cun corrieras sostenìbiles e siguras, faeddande e zughinde e pòmpiu cantu zai si faghet a dies de oe in Emilia-Romagna. Poi s’at a faeddare puru de comente, zai dae pitzinnos minores, sos tzitadinos si potant abituare a si cumportare bene po no imbrutare su logu.

In totu sa chida b’at àere àteros atopos: s’at a faeddare de comente si vivet in Barcellona, inube si est dande atentzione manna a sos caminantes e a sos tziclistas. Infatis, in custa tzitade b’at logos meda po custa zenia de zente, chi podet andare a totue sena perìgulu perunu dae parte de sas veturas o de sas corrieras. In custas dies b’at àere puru momentos de fainas, comente su “parking day”. In custa bell’ocasione sos parchègios de carchi carrela ant a
divènnere logos a mesura e impreu de sos tzitadinos. Ant pensadu puru de ammaniare una die inube chie at sa bitzicreta at a pòdere caminare peri sas pistas tziclàbiles, chi mancari ancora non connoschet bene: est custa una manera de fàghere informatzione a sa zente.

Sa Chida Europea de sa Mobilidade s’at a conclùere cun unu laboratòriu e una chistionada inube sos tzitadinos, sos amministradores e sos espertos ant a relatare subra de su tempus bennidore de Casteddu, faeddande de allegas chi ant a tratare comente rèndere sa tzitade pius sigura, sostenìbile e vivìbile. Cun totu custas cosas, Casteddu abbarat firma subra de s’impinnu chi dae annos at mustradu po sa promotzione de una vida urbana sostenìbile.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22