Sa Sardigna, cun 686 sitos violados dae sos hacker, est a su de ses postos in sa classìfica natzionale fatu fatu a Toscana, Sitzìlia, Lombardia, Emilia Romagna e Lazio.

In sos ùrtimos 15 annos sunt istados 11.555 sos sitos de interessu regionale contados dae s’Istitutu Demoskopika chi ant subidu atacos informàticos de vàriu tipu. In Sardigna sunt istados pigados de assaltu 15 sitos istitutzionales: in generale – custa s’anàlisi de su datu natzionale – subra 1.250 hackeràgios analizados acontèssidos in sos ùrtimos 18 meses (dae mese de argiolas 2015 a oe) prus de sa metade, su 55,5 pro chentu tenet unu movente polìticu.

Su bellu de 694 violatziones, firmadas dae hacker chi pro su prus narant de èssere musulmanos. Àtera motivatzione, est ligada a su disìgiu de s’hacker de dimustrare sa vulnerabilidade de su situ e rivendicare s’atzessibilidade pro totus de sas informatziones.

Unu tempus de isporu e accottu at imboligadu Valledoria, inube sa comunidade si est affacchiada po narrere “No” a sa violentzia, pustis de sos attentados graves fattos cun su fogu, chi ant corpadu sa filigresia de su Cristu Re e su ex parracu suo, don Frantziscu Mocci.

Chentinajas de fideles ant partetzipadu a una proffiscione in sas bias de sa bidda, chi est finida cun d’una Missa tzelebrada in su palattu de s’isport, dae su piscamu de Tempio-Ampurias, Roberto Fornaciari. In su mentres de sa celebratzione, su Piscamu Fornaciari at diritzadu un’appellu dae su coro a sa comunidade, imbidande chie tenzat notissias chi serbant, a faeddare cun sas autoridades.

Sas peraulas suas ant evidentziadu s’apprettu de faghere lughe supra cantu est sutzessu. Sa Missa est bistada unu momentu de consideru e de isperantzia, ma puru po bistare accanta a don Frantiscu Mocci, chi est bistadu iscuttinadu dae s’accadessimentu. Pustis de essere bistadu mira de paritzos accadessimentos de intimidassione, su parracu at dassadu sa ghia de sa filigresia, tuccande in d’una attera comunidade. Su Piscamu at creffidu dare a sos chi funt presentes sos saludos de s’ex parracu.

Sa bessida a campu at bidu sa partessipatzione de casi dughentas pessonas, unu signale forte de unione e resistenzia contra sa violentzia. Sas fraccas azzesas in su mentres de sa proffiscione ant lughizadu sas carrelas de sa bidda, mustrande sa volontade de no si apprigare a sa timoria. In su mentres de sa preiga, su piscamu at evidentziadu s’importantzia de accomettare sas difficultades cun corazu e ispiritu de unidade. At imbidadu sos fideles a no si arrendere a s’annuzu, ma a impittare custa crisi comente un’opportunidade po affortigare sos ligamenes de sa comunidade e tribagliare imparis po su bene de tottus.

S’incorazamentu a addurare unidos est bistadu accollidu cun emossione meda dae sos presentes, chi ant bidu in sa celebratzione unu puntu de tuccada po unu caminu novu de paghe e appaghiamentu.

In su mentres sas scruccullas sunt andande a daenanti. Sos aberguadores sunt chircande de assebertare sos responsabbiles, controllande donzi minimu elementu chi potat faghere lughe supra sas resones e supra chie at fattu custos crimenes. Sas autoridades de su logu e sa comunidade ant espressadu accottu prenu a sa politzia, cunfirmande sa netzessidade de faghere craresa.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22