Sa diòtzesi ogiastrina rinnovat sa fide a patrona sua. Domìnigu su 24 de abrile at a èssere una die de devotzione pro sos medas fideles chi dae totu sa provìntzia ant a arribbare finas su santuàriu de Lanusè pri sa festa de sa Madonna de Ogliastra. Su 21, su 22 e su 23 de abrile ddoe at a èssere su triduo de preparatzione tzelebradu dae Padre Tarcisio Mascia, para caputzinu de Voce Serafica de sa Sardigna.

Sas còpias chi ocannu festant sos 25 annos de coja, ant a rinnovare sas promissas sàbadu su 23 a sa congruida de su triduo e ant a retzire una beneditzione. Domìnigu a sas 9.30 at a èssere tzelebrada sa Missa de su ministru provintziale de sos paras caputzinos Padre Giuanne Atzori. A sas 15.30 su bultu de sa Madonna de Ogliastra at a lassare su Santuàriu e colende fatu fatu de su tzentru istòricu at a lòmpere a sa pratza de sa catedrale. In cue l’ant a retzire su pìscamu ogiastrinu Muns.

Antonello Mura e totu sos satzerdotes de sa diòtzesi, paris cun sos medas fideles. Dae sa catredale sa protzessione at a partzire cara a su Santuàriu. A s’arribu su Pìscamu at a tzelebrare sa Missa Santa paris cun sos satzerdotes, e a s’agabbu totu sa iòtzesi at a rinnovare s’atu suo de afidamentu a Maria. Durante sa missa ddoe at a èssere peri s’ordinatzione diaconale de su seminarista Evangelista Tolu.

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22