Pagos dies faghet sos vàndalos sunt torrados a intrare in atzione a Lanusè.

Custa borta est istada dannegiada sa Catedrale de Santa Maria Maddalena, a su tzentru de sa tzitadina. Sos muros sunt istados imburtados cun unas iscritas vituperiosaas fatas cun su spray contra sa tzitade e contra calicunu tzitadinu in particulare.

Un’atu vandàlicu a cale sa comuna ogiastrina a dolu mannu no est nou, sena carchi giustificatzione eprus grave de su fatu chi a nde fàghere sas ispesas custa borta est istadu unu logu sacru. Su pàrracu de sa Crèsia Don Minuccio Stochino, preferit a no allegare de su chi est capitadu.

Sa protesta de sos dipendentes de sos entes locales in Casteddu est esplòdida cun fortza, evidentziende sa farta grave de personale chi corpit sas amministratziones locales in totu sa Sardigna. Unas duamìgia pessones ant prenadu sa Pratza de sos Chentumìgia, cun capeddos e mallieddas biancos comente sinnu de unione e mobilitatzione.

Su corteu, chi at cumintzadu pagu a pustis de sas 10:30, s’est dirìgidu cara a su Cussìgiu regionale, atirende partetzipantes bènnidos dae cada parte de s’ìsula. Sos manifestantes ant pesadu su problema de sos reduidos e de sos discumbènios chi minant sa frunidura de sos servìtzios a sos tzitadinos e a sas impresas. Sa presèntzia in pratza est istada significativa, cun una trentina de sìndigos e diversos esponentes polìticos de importu, intre custos Alessandra Todde e Renato Soru, candidados a sas eletziones regionales imbenientes.

Su coro de sa protesta est sa rechesta de adotare unu “cumpartu ùnicu” cun règulas e tratamentos econòmicos paragonàbiles a cuddos de sos dipendentes regionales. In su manifestu de protesta, si sutalìniat chi petzi sa Sardigna, paris cun sa Sitzìlia, no at galu adotadu custu cumpartu pro sos entes locales.

Sos manifestantes denùntziant sa diferèntzia de salari intre sos dipendentes regionales e cuddos de sos entes locales, nointames acumprant mansiones sìmiles. Sa creatzione de unu cumpartu ùnicu, afirmant, diat garantire un’echilìbriu in sa distributzione de su personale, cunsentende una programatzione integrada de sos servìtzios pùblicos sardos. Si punnat a prevìdere assuntziones noas, mescamente in sos comunos piticos, pro parare fronte a s’ispopulamentu de sas àreas internas causadu dae sa farta de servìtzios.

Su 22 de santandria, acanta s’àula consiliare de su Comunu de Aristanis, est istadu istituidu unu comitadu dedicadu a custu tema, rapresentende su cumintzu de unu percursu de mobilitatzione paghiosa e democràtica. S’obietivu est de reformare sa pùblica amministratzione de sa Sardigna pro garantire unu servìtziu pùblicu efitziente e ecuànime in totu sa regione, ponende fine a una situatzione chi minat sa calidade de sa vida de sos tzitadinos sardos.

Una delegatzione de sos dipendentes de su Comunu de Tortolì est presente a sa manifestatzione, evidentziende sas diversisade  salariale e sas diferèntzias de tratamentu respetu a sos dipendentes regionales.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”