Suma manna meda cuada in su badalciu: secuestrados prus de 160mizza euros a unu passizzeri chi andaiat a Barcellona.

At tentadu de che passare sos controllos nande chi teniat una tzifra bassa, ma in su badalciu de istiva cuaiat una suma meda prus arta. Est cantu accadessidu sas dies passadas in s’aeroportu de Casteddu-Elmas, inube sos de sa Finantzia, in collaborassione cun su personale de s’Agentzia de sas Duganas e de sos Monopolios, ant iscopertu e secuestradu 160miza euros.

Unu passizzeri chi fuit partinde pro Barcellona, frimmadu pro unu controllu in chirca de dinari chi bessit dae s’iscrocca natzionale. A sa dimanda de decrarare si teniat dinari, s’omine at nadu de tennere casi 300 euros in busacca e atteros 1.000 in su badalciu. Una cosa chi no at cumbinchidu sos de sa Finantzia, sos cales ant dezisu de faghere atteros atzertamentos. Ant duncas controlladu menzus su badalciu de istiva, giai imbarcadu supra s’aereo chi fuit prontu a
partire. Propriu intro de sa baliza sunt bistados agattados otto imboddios sutta de boidu, sizillados bene, chi teniant intro dinari de chimbanta euros.

Su contu de su dinari at iscopertu una tzifra divressa dae cussa decrarada:160.150 euros, cuados in manera de non los faghere agattare in sos controllos ordinarios. A cussu puntu, a su passizzeri est bistada secuestrada tottu sa suma. Sos atteros atzertamentos fattos dae sas autoridades ant bogadu a pizu atteros elementos supra su biazadore:s’omine, difattis, resurtat brivu de reddidos decrarados e est giai connottu dae sa politzia pro atteros pretzedentes pro su mattessi motivu. Cosas chi ant affortigadu sos suspettos supra s’issida illetzida de su dinari.

A su mamentu de su controllu, su passizzeri no est bistadu capatze de dare ispiegatziones chi si podiant creere ne documentos balidos pro zustifigare su possessu de una suma gai arta. Pro custu motivu, addia de su secuestru de su dinari, sunt partidos atteros atzertamentos dae parte de sa finantzia.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22