Bator milliones de èuros pro un’asseliu poderosu de sas iscolas de Iersu. Sa comuna ogiastrina, in su beranu coladu, est istadu seberadu tra sos destinatàrios de sas risursas regionales destinadas a su Programma istraordinàriu de interventos de edilìtzia iscolàstica mutidu “Iscol@”.

Dae tando, sa Giunta ghiada dae Roberto Congiu, in collaboratzione cun sos tècnicos cumonales, at adobiadu a tantis bias s’istrutura de missione costituida in Casteddu, acanta sa presidèntzia de sa Giunta regionale, cun su còmpitu de coordinare e ghiare in su percursu chi giughet a sa realizatzione de sos interventos de s’Asse I. Si trata de sa parte prus innovativa de su programma, chi previdet su fàbricos de edifìtzios noos pro avalorare de prus s’aprendimentu e sos bisòngios de sotzializatzione de iscolanos.

In particulare, durante s’ùrtimu atopu de pagas dies faghet, sunt istadas postas sas bases pro s’ammàniu de su gasi naradu “Documentu Preliminare a sa Progetatzione”, in fase de discinimentu, a su cale at a sighire su cuncursu de progetatzione.

“S’amministratzione – faghet ischire s’assessore de s’Istrutzione Antonio Piras – at atribuidu in deretura caràtere prioritàriu a sa realizatzione de s’interventu, destinadu a cunsolidare su ruolu istratègicu assignadu a s’imparu. S’interventu, chi s’at a cuntzentrare in s’àrea immoe ocupada dae sos edifìtzios de sas iscolas elementares e mèdias, de sas rispetivas palestras e de sos ispàtzios birdes a costadu, tenet contu de sa netzessidade de resonare in manera subracomunale, pro more de ofèrrere a su territòriu edifìtzios adeguados e una didàtica noa, trastos cunsidetados indispensàbiles pro parare fronte a s’abbandonu iscolàsticu e pro megiorare s’aprendimentu”.

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22