Falsificaiant cartas de dèpidu, patentes e tèsseras sanitàrias: duas fèminas e un’òmine sunt istados firmados e denuntziados apanas sunt essidos dae s’ufìtziu postale de Àrthana, in ue aiant in pessu intentadu de ativare de sas cartas ricaricàbiles.

In sa percuisitzione domitziliare, sos militares ant agatadu diferente materiale comente 33 tèsseras sanitàrias, 23 patentes de guida, 2 cartas PostePay, unu bancomat, 134 tèsseras plastificadas biancas e unu skimmer, e in prus trastos pro falsificare documentos (computer, scanner, imprentadoras).

Tenent tra sos 25 e sos 34 annos, totus cun medas pretzedentes pro trufa e frode informàtica. L.D. (classe 85), E.V. (classe 82) e L.M.L. (classe 91) ativaiant cartas ricaricàbiles intestadas a sugetos inesistentes pro fàghere trufas in internet. Dae paritzas dies sos militares si fiant apostato, a pustus de medas sinnalamentos fatos dae vàrios ufìtzios postales de sa zona, chi aiant signaladu sa presèntzia de sugetos suspetos.

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”