Perdas. Fabio Lai in su blog cosa sua:“Deo non so Gian Piero Scanu”.

“Serbit una batalla sèria pro amparare sos diritos e su benidore de totu sos chi bivent e produent economia in su territòriu nostru e in cussu sardu gràtzias a s’indotu creadu dae sos polìgonos militares”, custa, una de sas frases fortes essidas in su documentu aprovadu a manera comuna e propostu dae sa minoria in su cussìgiu cumonale foghesinu su 24 de freàrgiu coladu. Una positzione unànime in defensa de su traballu.

Donat meda pessamentu, in sa bidda ogiastrina, sa possìbile serrada de su polìgonu militare e sa cunsighente pèrdida de chèntinas de postos de traballu. A intzitare una polèmica noa sa cumparta eris in “la Nuova Sardegna” de un’ intervista a su deputadu de su partidu democràticu olbiesu Gian Piero Scanu, a tìtulu “Scanu: “cungemus sos polìgonos”, in mese de làmpadas sa proposta a sa Càmera”.

Pro mèdiu de un’artìculu de su blog suo (fabiolai-it.webnode.it), at bòlidu rispòndere a su deputadu Scanu, Fabio Lai (27 annos) cussigeri cumonale de Foghesu. “Apo lèghidu custu mangianu cun arrenegu e ispantu -non solu pri sos decraros de s’Onorèvole de su Partidu Democràticu Gian Piero Scanu, chi in prus de èssere unu deputadu de sa Càmera tenet fintzas su ruolu de Presidente de sa Cummissione de inchiesta de sa Càmera pro sos efetos de s’uràniu impoveridu, ma fintzas pro ite su Parlamentu e su Guvernu, diant fàghere bene a crarire cale est su ruolu chi depet acumprire sa Cummissione de inchiesta. Cussa de indagare subra sos efetos de s’uràniu impoveridu o su de programmare sa serrada de sos Polìgonos? Pro ite a custu puntu agato inammissìbile chi unu parlamentare sardu chi tenet s’obietivu craru de cungiare sos Polìgonos militares in Sardigna siat in su matessi tempus su “giùighe” chi -a pustis de sas vàrias indàgines- at a espressare unu parre subra sas fainas chi s’acumprint a internu issoro”.

“S’onorèvole Scanu diat bòlere costruire unu casteddu de arena. Faeddat de una reconversione ma issu matessi no est a tretu de ispiegare in cale modu cheret sostituire s’indotu creadu dae sos polìgonos militares. Deo so contràriu a ogni tipu de reconversione e creo chi imbetzes serbat un’afortziamentu de su P.I.S.Q. (Polìgonu isperimentale e de addestramentu interfortzas sartu de Chirra). Fainas noas comente a cussas de su polu aerospatziale depent èssere acostagiadas a cussas militares. Sunt in manera istrinta connètidas, e cungiare sos polìgonos est comente a si iscùdere su marrone in sos pees” concruit Lai.

S’arte de su tessinzu in Sardigna: filos de istoria, identidade e bellesa chentza tempus.

Sa tessidura in Sardigna est un’arte millenaria, abbarbada in fundaria in s’istoria e in sa vida de donzi die de s’isula. Unu sapere antigu, passadu dae mama a fiza, chi in sos seculos at revertidu materiales simples comente lana,linu e cotone in manivattos unicos,fattos po mesu de telarzos a manu orizontales o ritzos.

Intre sas eccellentzias regionales prus de signifficu bi sunt sos tappettos sardos, nodidos po sa calidade de sos tribaglios e sa ricchesa de sas decoraduras. Meda isparta est sa tennica de su pibiones, giammada gai pro itte ammentat sos pupujones de s’aghina. Custu tribagliu, chi creat disignos tridimensionales supra sos pannos, est una de sas prus cumplessas e ammaghiantes e acciappat s’espressione massima sua in tzentros comente Samugheo, Nule e Mogoro.

Accanta a sos pibiones, un’attera tennica de su connottu, isparta meda est cussa a lizzos, chi permitit de faghere motivos geometricos cadrios e chi si repitint. Non mancana tribaglios prus antigos e reffinados comente su puntu a traccu, impittadu mescamente po decoraduras essentziales e ideales, e sa produssione de s’arbaxi, unu pannu de lana chi no est tribagliada, cumpattu e chi non faghet passare s’abba, chi a s’ispissu fuit impittadu po bistires de su connottu e manteddos.

Sa Sardigna mustrat una variedade istravanada de tzentros de produssione, donzunu cun d’una forma chi si reconnoschet. Samugheo, in su coro de s’Aristanesu, est cussideradu su logu printzipale de s’artesanadu tessile sardu e accasazzat unu connottu bivu, chi fintzas oe est capatze de si mezzorare chentza perdere sas raighinas suas. Nule, in sa costera, est tzelebre po sos tappettos in lana dae sos colores cadrios e dae sos motivos geometricos detzisos, mentres Aggius, in Gaddura, si annodittat po cosas fattas a manu dae sas tonalidades prus cardas e naturales,ispiradas a sa bista granitica de s’iscrocca.

Unu rolu de primu pianu ispettat fintzas a Mogoro, nodidu po sa produssione de tappettos e aratzos e po s’istorica viera de s’artesanadu, chi donzi annu faghet arribare bisitadores dae tottu s’isula. Atteros tzentros importantes sunt Isili e Busachi, inube sa tessidura sighit a essere pratigada secundu tennicas de su connottu, manteninde biva una cultura de su “faghere” chi resistit a su tempus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22