Acqua di Sardegna, azienda sarda de contu in su campu de sa profumeria e de sa cosmètica, at presentadu pagu tempus faghet su profumu nou cosa sua Scalo Porto Cervo, siat pro òmine siat pro fèmina. Su protagonista feminile de sa campagna publitzitària est s’ogiastrina Vanessa Barrui. Sa modella irbonesa, fotografada dae sa fotògrafa Sara Montalbano, trucada e petenada dae Alice Alfonsi e Tania Nitsak, at posadu paris cun su modellu Emilio Puggioni in unu iscenàriu ispiradu a sa Gallura de prima, cando non fiat galu connota dae totus ma fiat frecuentada petzi dae s’arta sotziedade.

Is cartellones publitzitàrios ant a èssere postos in is profumerias Limoni e La Gardenia de totu Itàlia. Tando, unu bellu resurtadu pro sa modella de Irbono chi a pustis de sa làurea in riabilitatzione psichiàtrica, s’est iscrita in sa facultade de meighina.

Energia, creschet s’ispesa pro impresas e famìllias sardas

Sas impresas e sas famìllias sardas sunt sighende a fàghere sos contos cun una depressione energètica chi, nointames de sos primos signales de rallentamentu, paret ancora resistente meda.

Su pesu de sas bulletas abarrat artu meda e nch’est ancora a tesu sa normalidade de sos prètzios de in anti de sa crisi. S’energia abarrat unu de sos fatores chi pesant de prus subra de sa solididade econòmica de sa Sardigna, cunditzionende non sa cumpetitividade de sas aziendas ebbia, ma finas sa calidade de sa vida de sa gente.

Sas impresas piticas e medianas de s’ìsula ant tentu un’ispesa in prus de 77 milliones de èuros (prus o mancu) causada dae s’energia incarida. Unu nùmeru importante chi ponet frenos a sas intradas, ponet barrancos a sos investimentos e bortas meda non permitit sa pianificatzione de sa crèschida. Finas pro sas famìllias sardas sa situatzione abarrat dificultosa. Sos prètzios pro s’impreu de s’elètricu e de su gas in paragone a su 2021sunt prus artos de su 42,3%.

Su cunfrontu cun situatziones europeas prus o mancu che pare ponet in evidèntzia comente a sas impresas sardas piticas e medianas lis tocat de parare fronte a una diferèntzia cumpetitiva carculada in 14 milliones de èuros. S’energia duncas est est una de sas isfidas prus importantes pro s’isvilupu econòmicu de s’ìsula. A minimare su càrrigu fiscale in sas bulletas, faghende finas interventos mirados pro fàghere crèschere sa resa energètica e s’auto-produtzione, podet dare un’agiudu pro chi su benidore de sas impresas e de sas famìllias sardas si potzat suportare mègius.

Su de passare a fontes rinnovàbiles e su de megiorare sos consumos sunt trastes primàrios pro minimare sa dipendèntzia dae sos mercados de fora e pro trasformare s’ispesa pro s’energia in una possibilidade de crèschida, cumpetitividade e annoamentu. In una situatzione econòmica globale pagu segura, a moderare s’ispesa energètica est indispensàbile pro dare istabilidade a sas aziendas, pro agiuare sa gente e pro s’isvilupu sostenìbile de sa Sardigna intrea.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”