Est cumentzada dae s’Ogiastra sa de ses editziones de Significante, sa Rassigna se Ispetàculos tra Foeddos e Mùsica de is Fìgios de Arte Medas, s’assòtziu culturale ghiada dae su Maistru Gianluca Medas. Ocannu s’argumentu printzipale at a èssere sa Giustìtzia; difatis, giòbia 4 de abrile, in Elini, est istadu presentadu su libru “ Còdighe de sa vendita barbaritzina”, de s’autore orunesu Antonio Pigliaru (Orune 1922- Tàtari 1969). Nois de Vistanet.it fìamus indedda e amus intervistadu a Gianluca Medas a in antis de s’ispetàculu cosa sua.

Maistru, proite ais isseberadu unu tema gosi difìtzile comente cussu de sa Giustìtzia?

Amus isseberadu custu tema pro ite oe semus bivende tempos difìtzile a beru, marcados dae medas ingiustìtzias: sotziale, econòmica e finas polìtica. Pro custu amus selladu de indagare a pitzu de sa notzione de Giustìtzia, in intro de su significu suo prus artu, partende pròpiu dae su cuntzetu chi nde teniant is intelletuales e is òmines mannos de su tempus coladu che a Pigliaru. S’importu de custu autore est su de àere descritu in manera atenta e pretzisa s’idea chi si teniat de sa giustìtzia in sa sotziedade sarda de is primos annos de su 900.

In Sardigna cun su faeddu Giustìtzia si identìficant finas is magistrados, sa politzia e is giùighes. In ogna manera su significu de custa paràula tenet, de sòlitu, unu valore negativu, bastat a pensare a is modos de nàrrere comente a “sa giustìtzia mala, sa giustìtzia chi ti mòciat, oppure ‘tza chi ti cùrgiat”. Segundu issu, cales sunt is raighinas de custu sentimentu contràriu de is sardos pro sa giustìtzia?

In s’antigu sa Giustìtzia rapresentaiat su Re, unu Re istràngiu chi non istaiat in Sardigna, ma chi in s’ìsula giughiat is rapresentantes suos chi cumandaiant sa giustìtzia. Custos rapresentantes fiant malos cun is pòberos e bonos cun is ricos. Custa situatzione at cunditzionadu sa mentalidade nostra e finas sa manera de allegare nostra.

Sa tarea de s’Assòtziu Fìgios de Arte Medas est cussu de leare a in antis unu discursu basadu a pitzu de su Teatru, de sa Cultura Populare e de sa Narratzione. In custa rassigna, però, sa Cumpangia teatrale bostra ponet in iscena finas òperas clàssica e testos literàrios chi pro definitzione sunt cultos e dotos, e non populares! Comente est possibile custu acostiamentu tra literadura e Cultura populare?

Pro medas custu acostiamentu diat a pòdere pàrrere atrividu, ma chie connoschet s’istòria nostra ischit chi no ddoe est nudda de istranu. Deo bèngio de una famìllia de teatristas chi pro traditzione at semper postu in iscena cummèdias dialetales e populares, ma cada rapresentatziones giughiat in intro unu significados dignos de is òperas clàssicas. Tocat finas a si subènnere chi sa literadura at semper pigadu ispiratzione dae sa cultura populare.

In is ispetàculos chi leades in iscena donades unu grandu tretu a sa mùsica, difatis is òperas bostras sunt òperas mùsicu- teatrales. Ma cale est sa funtzione de sa mùsica in intro de sa rapresentatzione?

Sa mùsica est una manera comente a is àteras pro contare un’istòria. Est che a sa boghe etotu. Gosi comente ballu e mùsica faghent sa festa, gosi boghe e musica faghent su contu. Pro custu devo torrare gràtzias a is collaboradores mios: Andrea Congia, chi sonat sa chiterra clàssica e Enzo Favata chi sonat su sassòfonu.

Custa istade in Elini ais leadu in iscena su libru de Marcello Fois dedicadu a Samuele Stochino, sa Tigre de s’Ogiastra, Memòrias de su bòidu. Proite sa gente est galu interessada a sa figura de custu bandidu?

Creo chi Samuele Stochinu non siat unu esempru chi tocat a sighire, pro ite ca fiat unu delincuente chi at mortu finas una pipia innotzente. In ogna modu creo chi sa gente siat prus interessada a su disìgiu de giustìtzia suo, chi a sa fine est su matessi chi tenimus totu.

Gràtzias Maistru!

Sardigna in daesegus in sa classifica supra su clima e calidade de sa vida.

Su clima podet fittare supra sa calidade de sa vida in sas tzittades e sos datos prus reghentes lu cunfirmant fintzas pro sa Sardigna. In sa classifica de sas tzittades printzipales pubbricada dae su Sole 24 Ore, chi controllat sas cundissiones climaticas e su corpu supra sa vida de donzi die, carchi tzittade de s’isula si agattat in sa parte prus bassa de sa classifica natzionale.

In manera particulare est Carbonia a serrare sa classifica cun su 107° postu, s’urtimu intre sas tzittades printzipales esaminadas. S’istudiu leat in cussiderassione paritzos trattos de su clima pro cumprendere cantu sas cundissiones meteo potant influentzare su benessere de sas pessonas e sa vivibilidade de sos tzentros de sas tzittades. S’analisi si accottat supra 15 motivos ligados a su clima. Intre custos bi sunt s’intensidade de s’abba, su numeru de sas nottes in sas cales sa temperadura minima non calat sutta sos 20 grados, sas dies de cardu urtimu, sa presentzia de bentu in su mentres de s’istiu e s’umidesa de s’aria.

In su casu de Carbonia, secundu sos datos regortos, pesant mescamente sas temperaduras artas meda registradas in s’annu e su numeru minimadu de dies frittas o cun abba allongada. Custas cundissiones climaticas fittant supra su risurtadu finale de sa tzittade de su Sulcis chi si acciappat duncas a s’urtimu postu de sa classifica.

Est importante evidentziare chi s’istudiu si relatat a sos datos de su 2025 e non tenet contu de cantu accadessidu in sos primos meses de su 2026, cando totta sa Sardigna est bistada interessada dae una simana de abba prus bundante in cunfrontu a sa media de sos urtimos annos.Una cosa fora de norma de su clima chi at distintu s’incumintzu de s’annu ma chi non recuit in s’analisi impittada po faghere sa classifica.

Abbaidande su restu de sa classifica si nodat chi a sos primos postos si agattant mescamente tzittades supra su mare Adriaticu. A su primu postu de sa classifica bi est Bari. Sa classifica evidentziat comente su clima siat divenninde un’elementu semper prus importante cando si faeddat de calidade de sa vida in sas tzittades. Sas temperaduras artas meda, sos periodos de assuttura o a su contrariu de abba meda sunt cosas chi fittant supra sa salude, s’ambiente e supra sa vida de donzi die de sas pessonas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22