Amus allegadu a Paolo Stochinu, architetu originàriu de Àrthana e assessore a is Traballos Pùblico de su Comunu de Tortolì.

Bonas dies Assessore, a in antis de cumentzare ddi bolia domandare si isse si intendet prus de Tortolì o prus de Àrthana.

No est una risposta simpre. Mama mia est irbonesa e babbu miu fiat de Àrthana, bidda in ue apo passadu sa pitzinnia mia finas a deghe annos. A ùndighi so andadu a istudiare a Lanusè, a canta apo sighidu su Seminàriu pro tres annos finas a sa Lissèntzia Mèdia. Is iscolas superiores ddas apo fatas in Nùgoro e s’universidade in Gènova. Sa cosa segura est ca apo passadu prus tempus de sa vida mia in Tortolì e inoghe apo pigadu sa domo e so pesende a is fìgios mios. In fines, creo chi unu siat de sa bidda de cantu bivet.

Comente s’istat in Tortolì?

Tortolì est una tzitade a mesura de òmine, si nche bivet bene. Tenimus galu medas cosas dae fàghere, penso a is infrastruturas e a is caminos, ma est su logu ideale a canta si fàghere una domo e pesare una famìllia.

In is ùrtimos annos sa populatzione de Tortolì est aumentada meda, a discàpitu però de is biddas de inghìriu. A ite est dèpidu, segundu isse, custa crèschida de is abitantes?

Est pròpiu comente as naradu tue etotu. Medas de is abitantes de is biddas probianas sunt calende a bìvere a Tortolì. Est unu fenòmenu demogràficu tzìclicu. Sèculos faghet capitaiat pròpiu a s’imbesse: fiant is de marina chi lassaiant sa bidda issoro e si cambiaiant a bìvere in su monte pro si sarvare de sa malària e de is atracos de is piratas. A dogna manera creo chi sa crèschida de Tortolì dipendat meda de s’arribu de istràngios chi sèberant custa tzitade pro ite donat prus possibilidades de traballu e prus servìtzios a sa gente.

Durante is eletziones comunales isse est istadu unu de is candidados prus votadu. Comente est renèssidu a otènnere custu resurtadu?

Is parentes mios non istant is Tortolì e duncas no apo pòdidu contare a pitzu de is votos issoro, duncas mi so dèvidu donare de fàghere. Apo passadu sa campagna eletorale mia andende de unu bighinadu a s’àteru, de una domo a s’àtera, de una famìllia a s’àtera, pròpiu pro mi fàghere connòschere e pro connòschere deo e totu sa gente. Est istadu unu sèbere de profetu, pro ite is tortoliesos ant crètidu in mie e m’ant donadu su votu e prus che totu sa fidàntzia issoro.

Comente Assessore a s’Urbanìstica cale est sa soddisfatzione prus manna chi at tentu?

Sa soddisfatzione prus manna l’apo tenta unos dies faghet cando sa majoria de sa cale fatzo parte at aprovadu in manera definitiva su PUC. Nos abarrat petzi de isetare su parre de sa Regione.

Cale est su logu prus bellu e ispantosu de Tortolì?

De logos bellos nche nde tenet a fìgiu bonu, bastat a pensare a is Pedras Rùbia o sa Bellavista, sena contare su mare. Personalmente su logu chi m’est semper pràghidu de prus est su cùcuru de Monte ‘Atu pro more de sa vista chi si ddoe biet.

Ite ti aùguras pro Tortolì?

Ispero chi divenat su motore de sa rinàschida pro totu s’Ogiastra e chi siat capassa de creare unu isvilupu bonu, respetosu de s’ambiente e de sa salude de totus.

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22