Est bastadu s’averiguamentu de su Cumandu provintziale de is VV. FF., sollitzitadu dae su responsàbile de s’Ufìtziu Tècnicu Comunale pro pònnere in evidèntzia una cosa chi fiat crara e nòdida giai dae meda tempus: s’edifìtziu de s’istitutu iscolàsticu de is mèdias de Àrthana no est agìbile. Fraigadu in s’agabbu de is annos ’80 in sa localidade “Marronca”, dae semper at mustradu totu is difetos suos: umididade, trincos in su muru e tzacaduras in sa cobertura. Prus pretzisa est istada sa descritzione de is Vìgiles de Nùgoro: pamentu totu essidu pro more de su movimentu de su terrinu; trincos in is muros de tramesu e in is muros de càrrigu, umididade e abba in s’impiantu elètricu; malu funtzionamentu de s’impiantu de riscaldamentu e de is servìtzios igiènicos, e pro finire, mancàntzia de sa cunformidade de s’edifìtziu a is normas subra de is barrieras architetònicas.

Pro custu motivu su sìndigu de Àrthana Marco Melis at emanadu in presse un’ordinàntzia ordinende sa serrada de s’edifìtziu e sa tràmuda de is dischentes is àulas de s’Iscola Materna betza, in bia Satta, pro more de tutelare sa seguràntzia e sa salude de is iscolanos e de su personale didàticu.

S’archìviu de Màrio Faticoni divenit digitale e bi podent intrare totus.

S’archìviu de Màrio Faticoni, atore, regista e iscritore protagonista de sa cultura sarda, divenit como digitale e totus b’ant a pòdere intrare. Costòit pius de barant’annos de atividade teatrale e culturale de sa Sardigna. Est istadu irrichidu cun vìdeos, pìculos de ispatàculos e àteru materiale documentàriu, oferinde un’ogriada prena subra de s’istòria de su teatru de s’ìsula nostra dae sos annos Sessanta a oe.

Su sito web nou l’ant resu fruìbile a totus in sa matessi die chi issu at cumpridu sos annos, e ocannu nde faghet 88. Custa die est su 20 de
capidanni. Faticoni est unu de sos fundadores de su Teatru de Sardigna e at regortu in sos annos artìculos, fotografias, documentos e materiales de iscena in cantidade manna. Custu est su primu archìviu teatrale de totu sa Sardigna, chi su Ministèriu de sos Benes Culturales at riconnotu comente de importu mannu. Meda de totu cussu chi b’est in cust’archìviu est istadu donadu in su 2022 dae su Museo archeològicu natzionale de Casteddu. De sas cosas pius de importu, tocat de montovare, in sa banda de su giornalismu, un’intervista fata dae Faticoni a Costantinu Nivòla in Nova York.

Sos documentos de s’archìviu sunt istados campaniados dae Faticoni paris cun s’assistente sua Simona Loddo. Su portale, invetze, est istadu fatu dae s’istùdiu de Afredo Scrivani e regollet cosa meda, chi est de annos e annos de carriera. Faticoni, nàschidu in Verona, si nd’est bènnidu a istare a Sardigna, ube at regortu documentos meda. Custu sito web nos contat s’istòria de su teatru sardu, dae sos primos esperimentos de su Cut- Centro universitàriu teatrale in su 1959 fintzas a cando est nàschidu su Cit.

In s’archìviu b’at testos, regias, betadas de manu e distimonias de sas produssiones pius noas, cun una bisione bene fata de s’atividade artìstica de Faticoni e de su rolu tzivile, sotziale e polìticu chi at tentu su teatru sou in Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22