Si cramat “Sa fàbrica de s’abba” s’initziativa promòvida dae su CEAS de su Parcu de su Cramu de Elini pro s’annu iscolàsticu 2012/2013 indiritzada a is pipios de s’iscola primàrgia pro is cales s’at a aparitzare unu progetu de formatzione pro more de isparghinare sa cultura e su rispetu de una de is risursas prus de importu de s’umanidade: s’abba. S’initziativa, fata cun s’agiudu de su Nodo In.F.E.A. (Informatzione Formatzione Educatzione Ambientale) de sa Provìntzia de s’Ogiastra, si est partzida in custa manera: una letzione de 2 oras fatas in classe cun sa visione de immàgines e vìdeos chi pertocant s’abba in Ogiastra; impreu e consumos de s’abba de bufare; inditos a pitzu de su consumu e de s’aorru de s’abba; addòbiu de 4 oras in classe pro s’acumprimentu de cartellones, laboratòrios manuales e giogos didàticos. Is tareas printzipales de su progetu ant a èssere: 1- Connoschèntzia de is risursas ìdricas de s’Ogiastra;”- Analizu de sa situatzione e de sa gestione de s’abba; 3- Mudamentu de su manìgiu e de su consumu de s’abba a manera prus sustenìbile. Su progetu s’at a fàghere gràtzias a sa collaboratzione de is Tzentros de Educatxione Ambientale e a sa Sustenibilidade de sa Provìntzia de s’Ogiastra ativos in su territòriu, est a nàrrere su CEAS de Elini, su CEAS de Tortolì, su CEAS de Ulassa, su CEAS de Orthullè e su CEAS de Foghesu.  Su primu addòbiu cun s’iscola primàrgia de Elini s’est giai tentu su 26 de martzu 2013, ma pro is apuntamentos imbenientes ant a leare parte a is traballos finas is iscolas de Àrthana, Irbono, Lanusè e Loceri.

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22