Chie cumprendet de artisania ischit chi “Su ballu tundu” non est petzi unu ballu traditzionale de Sardigna ma finas una de is mègius òperas sarda oe in tzirculatzione; difatis est su nùmene de unu tapete fatu a  manu cun su telàrgiu antigu de Orthullè dae s’artisana Elena Mulas. S’òpera, de forma retangulare,  pigat ispiratzione dae  is figuras e dae is passos de su ballu prus connotu de Sardigna e est nàschida unende sa lana sarda cun s’iscraria. Duncas, prus de una tessidura, est pròpiu un’òpera de arte frutu de unu traballu de isperimentatzione chi aunit s’innovatzione cun sa traditzione.

A pustis de èssere istada presentada in Torinu su 26 e su 27 de Onniasantu 2011, in ocasione de sa mustra  “150 MANI”, s’espositzione de artisania, arte e design fata dae “CNA” e dae “Confartigianato”, s’òpera at a èssere esposta su primu de su mese de ladàmene  in Bruxelles. Sa rassigna, aberta dae is 18.30 finas a note manna in su Tzentru de is Cunvegnos de Bruxelles, sala 1b, avenue du Port 86c, at a èssere un’acontessimentu de grandu importu chi at a fàghere connòschere in Europa is traballos de sa butega de Artessile de Elena Mulas, ma at a dare onore finas a totu s’artisania sarda.

Bentu a prus de 100 km/h, prus de 200 interventos de sos vigiles de su fogu in Sardigna in su fine de chida.

Unu fine de chida de tempus malu meda at proadu sa Sardigna, ferta dae bentu forte meda chi ant binchidu sos 100 km/h e dae un’abbiza meteo po arriscu fintzas de nie in sos montes de su tzentru de s’isula. Sa situassione at creadu problemas in tottue e dimandadu un’interventu importante de sos Vigiles de su Fogu, impignados in prus de 200 operassiones de succursu tennicu lestru supra de tottu s’iscrocca de sa Regione.

Sos problemas prus mannos bi sunt bistados mescamente in sas carrelas,inube sa rutta de medas arbures at creadu difficultades a sas macchinas, e in carchi casu, at intzidiadu sa serrada de carchi carrela. Sunt bistados casi 60 sos interventos fattos po che franghere arbures ruttos o chi funt po nde ruere, chi intzippaint carrelas, marciapes e bintradas de sas domos.

A custos si aggiunghent a su nessi 35 interventos po ponnere in siguresa ligados a su distaccu o s’arriscu de rutta de elementos de sos palattos, commente guarnisiones, teulas, insinzas e cartellones po sa pubblicidade,abbuttinados o movidos dae su bentu forte. In medas biddas bi sunt bistados puru dannos e domos privadas o pubbricas, cun sa netzessidade de allaccanare carchi zura po appartare perigulos a sos tzittadinos.

In su mentres, sos cumandos de sos Vigiles de su Fogu de Casteddu, Tattari, Nugoro e Aristanis sighint a controllare prus de 40 dimandas de operassiones chi sunt ancora in daesegus, cun sas isquadras impignadas chentza si frimmare po intervennere in sos logos prus apprettosos e cun arriscos mannos.

Su tempus malu, accumpanzadu dae s’abbizu meteo po bentu forte e nie in sas zuras prus artas, ad dadu unu contribbudu a cumplicare sas operassiones, in manera particulare in sas zuras de sa parte de intro de s’isula, inube sa minimada de sas temperaduras e sas ispentumadas ant fattu divennere prus diffitziles sas tramudas e sos interventos de succursu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22