Ogiastra: tres Sìndigos cun una punna comuna. Mèrcuris 26 de cabudanni, a is 9.30, in sa sala de su Consìgiu de sa Comuna de Elini, is Sìndigos de Gàiru, Lanusè e de Elini ant a ospitare is collegas issoro cun s’idea de fraigare unu “Coordinamentu chi tèngiat comente punna su propòsitu de nche bessire de custu momentu  malu de crisi pro more de dare una vida noa a s’iscenàriu ogiastrinu e regionale”. Pro lograre custu obietivu, segundu Roberto Marceddu, Davide Ferreli e Stefano Stochino, is rapresentantes de is istitutziones de su logu, is Sìndigos, diant a dèpere èssere prus aunidos e presentes e creare comente che una “sìntesi unitària” chi siat capassa de lassare a una banda is ideologias de is partidos chi oe in die sunt unu impèigu chi frenant s’isvilupu de s’Ogiastra. Durante s’adòbiu is “problemeddos” particulares de cada bidda ant a èssere postos a un’ala, pro more de donare prus pesu a s’Ogiastra e a sa netzessidade de formare unu Coordinamentu tra is Sìndigos de su territòriu. Custa, a bisu de is rapresentantes locales, est s’ùnica manera possìbile pro nche bessire dae sa crisi econòmica chi, mescamente in Ogiastra, paret chi non tèngiat gana de passare.  Medas boghes, medas puntos postos a dibatimentu, medas argumentos bogados a pìgiu, totus pro una punna sola: traballare in paris pro su bene de s’Ogiastra. S’unione , comente si costumat a nàrrere, at a fàghere sa fortza? Amus a bìere!

Sunt 47 subra 58 de sos chi nde tenent deretu sos Comunos chi ant formalizadu s’adesione a sa Fundatzione de su Treninu Birde.

Sos Comunos fundadores sunt sos sighentes: Azos, Aritzu, Àrthana, Brebì, Bortigiadas, Bosa, Calanzanus, Tzaramonte, Dèsulu, Elini, Flussio, Gàiru, Jelisuli, Irbonu, Ìsili, Iersu, Làcana, Laerru, Lanusei, Luras, Macumere, Magumadas, Mandas, Maltis, Meana, Modolo, Nulvi, Nuradda, Osilo, Osini, Pèifugas, Piaghe, Sàdili, Santu Antoni’e Calanzanus, Tàtari, Serri, Seui, Sòrgunu, Sune, Tèmpiu, Tinnura, Tonara, Tortuelie, Tresnuraghes, Ulassa, Ussassa, Biddamanna Strisàili.

Sos rapresentantes legales de sos 47 Comunos ant a firmare martis su 5 de nadale in Tàtari, a sas 10, in s’Àula magna de s’Universidade, a sa presèntzia de su notàriu, Andrea Porqueddu, s’atu costitutivu de sa Fundatzione chi tenet comente  òrganos su presidente, sa giunta esecutiva, s’assemblea de partetzipatzione e su revisore de sos contos. Podent otènnere sa cualifica de “partetzipantes”, sena deretu de votu in assemblea, sas pessones fìsicas e giurìdicas, pùblicas e privadas, sos entes e sos assòtzios chi contribuint a sas fines de sa fundatzione. Sa Giunta regionale, pro proposta de s’assessore de sos Trasportos, Antonio Moro, cun una deliberatzione aprovada in su cursu de s’ùrtima setziada, at designadu a sa càrriga de presidente su commercialista Elso Rei, 51 annos, titulare in s’omònimu istùdiu de cummertzialistas e consulentes de traballu.

Sa Fundatzione Treninu birde at a èssere presentada in Tàtari martis 5 de nadale, a sas 10, in s’Àula Magna de s’Universidade, in su cursu de unu cunvegnu abertu a su pùblicu, de su tema “Il treno ad altra velocità”, in ue ant a partetzipare su presidente de sa Regione, Christian Solinas, s’assessore regionale de sos Trasportos, Antonio Moro, su presidente de s’Anci, Emiliano Deiana, Giovanni Pruneddu, dotzente de Deretu de sa navigatzione e de su turismu de s’Universidade de Tàtari, e sa diretora de su mensile “Dove” (Rcs-Corriere della Sera), Simona Tedesco. Prevìdidos sos interventos de su retore Gavino Mariotti, de su sìndigu de Tàtari Gian Vittorio Campus, de su cummissàriu istraordinàriu de sa Provìntzia de Tàtari, Pietro Fois, e de su presidente de su Cussìgiu regionale, Michele Pais.

“Est una die istòrica pro su Treninu birde de sa Sardigna”- at naradu s’assessore Moro-. A pustis de annos meda, sa ferrovia istòrica prus manna  de Europa at agatadu duncas unu sistema de gestione chi potzat garantire finantziamentos pro satisfàghere sas aspetativas e sas aspiratziones de sos entes locales, de sos operadores, de sas impresas, de sos tzitadinos sardos e de sos turistas meda chi cherent unu biàgiu in sa Sardigna prus bera cun su trenu a àtera lestresa”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”