BIDDAMANNA: Usai, Marongiu, Muggianu, Cannas, Murino (67′ Scudu), Melis Marco, Monni (36′ Leoni), Loi, Lai, Deiana ( 82′ Nieddu), Pisano. Allenadore Puddu.

GELISULI: Gomiero, Serdino, Senes (45′ Matta), Pusceddu, Congiu, Nieddu, Canu, Mascia ( 8′ Murreli), Mereu, Mameli, Tegas. Allenadore Marongiu.

Su Gelisuli s’at agiudicadu su derby ogiastrinu de arta classìfica contra a su Biddamanna in una die cunditzionada dae su bentu meda. Is meres de domu sunt partidos bene arrischende pro duas bias de fàghere goal cun Loi, ma a su 24′ su Gelisuli est renèschidu a marcare gràtzias a s’abilidade de Mereu. In s’acabu de su primu tempus Senes at provadu a segnare ma sa bòcia at pigadu sa traversa. In sa segunda parte de su giogu est galu su Gelisuli a isciaddire a dae in anti cun Mameli, postu però in positzione non regulare. At provadu a  artziare sa conca su Biddamanna cun Cannas, ma Gomiero at firmadu s’interventu suo. A su minutu 87 est lòmpidu su goal de sa bandera pro du Biddamanna gràtzias a Pisanu chi cun una punitzione at fatu iscotulare sa rete de is aversàrios pròpiu in sa rugiada de is palos. A su minutu 88 su Biddamanna at pèrdidu s’ùrtima ocasione pro paregiare e sa bòcia est passada serente a sa traversa.

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22