S’esecutivu de s’Ue bolet abèrrere unu dibàtitu ampru a pitzu de sos sistemas de intelligèntzia artifitziale, pro garantire su controllu umanu e a modu chi siat trasparentes e tratziàbiles.
Mescamente cussos a arriscu artu comente su reconnoschimentu fatziale in setores sensìbiles comente sa salude, sa politzia e sos trasportos.
Sa Cummissione Ue in su “White Paper” pro s’abistesa artifitziale presentadu a Bruxelles at ispiegadu chi custos sistemas podent cumportare arriscos.
At agiuntu comente siat fundamentale a creare fidùtzia cun normas craras pro sas aplicatziones a arriscu artu, duncas cunformes a sa normativa europea.
Un’esèmpiu de sistema de intelligentzia artifitziale a arriscu artu est su reconnoschimentu fatziale. Custu podet èssere impreadu in casos etzetzionales ebbia, pro ite de sòlitu est proibidu.
In prus s’impreu suo depet èssere giustificadu, proportzionadu e depet dipèndere dae sas garantzias istabilidas dae su Deretu de s’Ue o dae cussu natzionale.
In pagos faeddos: s’Ue at a traballare pro individuare sas tzircustàntzias possìbiles chi diant pòdere giustificare sas etzetziones de s’impreu de s’abistesa artifitziale.
In su benidore, comente a at postu in annotu sa Cummissione, diat èssere importante a impinnare in sos 10 annos benentes investimentos de a su mancu 20 milliardos de èuros a s’annu pro isvilupare s’abistesa artifitziale, sos datos e su digitale.
Sa presidente de sa Cummissione europea, Ursula von der Leyen, in su profilu suo de Twitter at iscritu: tèngio ispetu bonu pro sa tecnologia, creo chi nos at a portare bene ebbia. S’Unione europea depet èssere capassa de fàghere sos sèberos susos, basados in sos balores suos, respetende sas règulas suas etotu. Custu est su chi muto un’Europa soberana dae su puntu de vista tecnològicu”.
Custu est su chi at naradu sa presidente de sa Cummissione europea in ocasione de sa presentada de s’istrategia digitale Ue.
Immoe nos abbarrat petzi de bìere ite at a acuntèssere in su benente, cun sa tecnologia semper prus protagonista in setores fundamentales de su continente europeu. S’Ue est bronta a incurtzare sa distàntzia cun sos Istados Unidos, ma cun una normativa pretzisa e segura.
