Sa ONLUS “Casa Solidale” de Tortolì, in bia de Locci, at aparitzadu una loteria a prèmios pro regòllere fundos dae impreare pro s’atividade de volontariadu su sòtziu. “Metti in moto la solidarietà” est su motu de s’initziativa chi s’at a concruire su 29 de onniasantu in ocasione de sa festa de Sant’Andria , su patronu de sa tzitade de Tortolì, cun sa bogadura de is billetes binchidores. Is billetes ant a èssere tirados in su teatru comunale Santu Frantziscu e semper in cue ant a èssere intregados is prèmios.

A su nàrrere de is organizadores, custa manifestatzione est istada pensada pro more de pònnere mèdiu a sa situatzione econòmica de su sòtziu chi est in unu istadu malu pro more de s’aumentu de is persones chi ogna die pedint unu pratu de cosa de papare. Tando onniunu de nois podet donare un’agiudu pighende a su mancu unu billete de sa loteria, seguros chi su dinare at a andare a sa gente bisongiosa a beru.

Is nùmeros de is billetes binchidores ant a èssere postos in su situ internet de sa crèsia de Sant’andria a cumentzare dae su 30 de su mese de onniasantu. Partetzipade in paritzos!

http://www.parrocchiasantandreatortoli.org/associazioni/casa-solidale/

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”