Si tzèrriat “Adotta un Nuraghe” su progetu nou promòvidu dae su sòciu culturale Agugliastra.it, una initziativa chi naschet cun sa tarea de permìtere a chie si siat de atzèdere a is sitos nuràgicos ogiastrinos abbandonados. Sa punna de s’assòtziu, duncas, est cussu de fàghere aumentare is vìsitas a is nuraghes prus a presu de is biddas, is gosi narados “nuraghes tzitadinos”, pro ite sunt cussos is prus fàtziles de lòmpere pro is tzitadinos e pro is istràngios. Is voluntàrios e is cumponentes de Agugliastra, duncas ant a limpiare is sitos archeològicos dae su buscu e dae s’àliga, ant a pònnere a postu is filetos e sa signalètica istradale. Custa eventu est patrotzinadu dae su Comunu de Lanusè e de Irbono, cun s’agiudu de sa Sobrintendèntzia de Tàtari e de Nùgoro e de su Corpus Forestale. Pro chie cheret leare parte a s’initziativa bastat a iscrìere intro lunis 22 de abrile 2013 a sa mail [email protected], bisitare su giassu internet http://www.agugliastra.it/speciali/iniziative/adotta-un-nuraghe.htm, opuru cramare a is nùmeros 3351011106 – 3471664785

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22