Sa Comuna de Elini est istadu seletzionadu pro unu progetu de su servìtziu tzivile natzionale a nùmene “inform@elini 2011”, chi previdit s’impreu, pro dòighi meses, de 4 giòvanos chi apant lòmpidu 18 annos e chi no apant isciaddidu 24 annos de edade (28 annos e 364 dies). Is voluntàrios, chi ant a retzire una paga de 433,80 èuros a su mese pro 30 oras a sa chida dae su lunis a su martis, ant a fàghere servìtziu in is ufìtzios comunales, pretzisamente in s’Isportellu Informàticu de su Setore de Educatzione a is deretos de is Tzitadinos, pro more de agiuare a sa tzitadinàntzia e assegurare a totus una tutela prus manna de is deretos issoro. Is giòvanos chi ant a leare parte a su progetu ant a tènnere sa possibilidade de crèschere dae unu puntu de annotu professionale, de afortiare su sentidu tzìvicu issoro, de megiorare sa capatzidade de traballare in iscuadra e de imparare e de achirire cumpetèntzias noas.

Is interessados, chi ant a èssere seletzionados dae una cummissione apòsita, ant a imbiare sa domanda de partetzipatzione a s’Ufìtziu Protocollu de sa Comuna de Elini, bia de Pompei n. 27, intru is 14.00 de su 28 de freàrgiu 2013. Is mòdulos de rechesta si podent iscarrigare dae su giassu internet ufitziale de sa Comuna de Elini: comunedielini.it.

Pro cale si siat informatzione:

serviziocivile.gov.it, regione.sardegna.it/serviziocivile;

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”