Comente ogna annu, a unas dies dae sa Diada de sa Memòria, sa ricurrèntzia chi su 27 de ghennàrgiu s’est festada in totu su mundu pro regordare su deportamentu, su disterru e s’istragu de su pòpulu ebràicu, sa Comuna de Irbono at aparitzadu un’addòbiu abertu a totu sa tzitadinàntzia pro ammentare e onorare is vìtimas de sa Shoah e pro inghitzare una dibata a pitzu de is gherras, de su ratzismu e de is persecutziones contra a is minoràntzias. A custu atopu, coordinadu dae Prof. Tonino Loddo e dirigidu dae su Sìndigu de Irbono Andrea Piroddi e dae s’Assessore a sa Cultura Gianluigi Serra, ant leadu parte su Prof. Aldo Borghesi, istudiosu de s’Istitutu pro s’istòria de s’Antifascismu e de s’Edade Cuntemporànea in sa Sardigna Tzentrale, e sa Segnora Gonaria Nieddu, insegnante in pensione autora de unu contu autobiogràficu a pitzu de sa Segunda Gherra Mundiale. A sa concruida de sa dibata sunt istadas lèghidas is testimonias de Gregorio Cucca, irbonesu chi s’est sarvadu dae unu campu de presonia in Brema, mortu in su 2012, e de Virgilio Bidotti, chi in su 1943 fiat istadu leadu a su campu de cuntzentramentu de Dachau pro motivos polìticos, mortu in su 2007. In prus est istada illestrida sa mustra fotogràfica ”Dachau”. S’addòbiu s’est tentu su 3 de freàrgiu 2013 in su Tzentru de Agregatzione Sotziale de Ilbono in sa bia de sa Tzircunvallatzione.

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22