Oe si nde sunt ischidados male is tifosos de su Casteddu chi custu mangianu, illuende sa televisione, ant intesu chi su presidente de s’iscuadra issoro, Massimo Cellino, est istadu acapiadu paris cun su Sìndigu de  Cuartu Sant’Elene Mauro Contini e cun s’Assessore de is Taballos Pùblicos de sa matessi comuna Stefano Lilliu. Is tres, interessados dae s’indagu subra s’ismanniamentu de s’Istàdiu de Is Arenas (incumentzada a pustis de unas denùntzias presentadas dae is Sòtzios Ambientalistas), sunt istados leados dae domo issoro  dae sa Guàrdia Forestale Regionale cun s’impudu de peculadu e de farsu ideològicu.   Segundu s’acusa, difatis, una parte manna de is resursas indiritzadas a su pianu integradu de àrea, diat èssere istadu impreadu pro su fràigu de s’istrutura noa in ue s’iscuadra casteddaja est gioghende ocannu. Mentras su GIP Giampaolo Casula pintat a Cellino comente si esseret un’òmine “avesu a sa delincuèntzia”, capassu de milli trassa bastet de otènnere su chi bolet, medas tifosos sardos e ogiastrinos difendent a su Presidente de su Casteddu, mustrende·ddi  totu s’istima issoro cun unu muntone de messàgios de solidariedade.  Unu de custos tifosos est Alessandro Ghiani, Presidente de su Casteddu Club Ogiastra, chi at naradu: “Penso chi custu acaessimentu siat sa cunfirma chi in Sardigna pro unu sardu est belle impossìbile a fraigare calicuna cosa de bonu. Seguros chi su Presidente nostru si siat cumportadu cunforma a sa lege, aprofitamus de custa ocasione pro ddi donare totu su sustegnu nostru in custa ora de dificultade”.

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22