Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Casteddu in retiru, como non podet prus isbagliare:sapadu sa porfia crae pro sa sarvesa.

Su Casteddu Fubbalu seperat sa linia tosta pustis de sa derrota de s’atteru sero contra su Sassuolo: dae oe s’isquadra andat in retiru pro preparare una de sas partidas prus de importu de s’istajone.

Sa truma si est acattada lunis a su tzentru isportivu de Assemini pro faghere sos allenamentos e, d’est addurada cumpatta pro mantennere arta sa cuncentratzione ispettande sa partida detzisiva pro sa sarvesa de sapadu a sa Domus contra sa Cremonese. Una partida chi balet prus de sos tres puntos e chi diat podere indissiare in manera detzisiva s’accabu de s’istajone.

Su mamentu est delicadu meda : sos ruju e blau sunt attraessande unu mamentu cumplicadu, fattu de resurtados chi non sunt bonos e partidas chi non ant cumbinchidu semper. Sa classifica addurat curtza in sa parte bassa, ma propriu pro custu donzi passu falsu arriscat de pesare su doppiu.Sas occasiones perdidas in sas urtimas chidas non ant permittidu a s’isquadra de si che istesiare dae sa zura periculosa, accreschinde sa pressione supra una truma chi como depet rispondere in presse.

Su seperu de su retiru andat propriu in custa filada:s’isolare,acciappare sa cuncentratzione e affortigare sos giogadores. In situassiones comente custa contat non solu su trattu tennicu, ma fintzas cussu mentale. Serbint luchidade, cumpattesa e mescamente sa capatzidade de poderare sa tesone de partidas chi balent un’istajone intrea.

S’arriscu est pretzisu: chena una bortada lestra, su Casteddu si diat podere agattare in sa battalla pro torrare in serie B fintzas a s’urtima partida, cun su periculu de deppere giogare tottu supra su filu de s’ecchilibriu o de non resessere a cansare sa rutta. Sas tumbadas derettas, comente cussa de sapadu, divennint duncas detzisivas: binchere cheret narrere de balanzare terrinu e cunfiantza, perdere cheret narrere dare puntos e morale a sos atteros.

A su mamentu sa banchina de Fabio Pisacane non si discutit, ma est craru chi su tempus benidore suo est subrassidu dae su risurtadu de sa partida imbeniente. Sa porfia cuntra sa Cremonese, ghiada dae s’ex Marco Giampaolo, tenet tottu sos perfilos de un’iscansada:dae una parte sa possibilidade de recuberare, dae s’attera s’arriscu de cumplicare sa cursa pro sa sarvesa.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22