Tortolì: s’assòtziu culturale “Eliconie Eventi” (rapresentada dae is tres tortoliesas Elisabetta Usala, Monica Cabiddu e Michela Girardi) e s’Acadèmia de Musical George Gershwin, dirighida dae Massimiliano Melis, s’ant a adobiare pro fàghere un’omàgiu a Cole Porter. Su 28 de argiolas a is 21.30, difatis, is duos assòtzios ant a abèrrere is ghennas de s’ex Blochiera de Tortolì pro donare a su pùblicu sa possibilidade de connòschere a su  jazzista, a s’autore, ma prus che totu a s’òmine chi pro unu deghènniu at ammajadu is plateas de totu su mundu cun is branos musicales suos. In cantzones suas ant a torrare a bìvere gràtzias a s’interpretatzione de Gianpriamo Incollu a su sassòfonu, de Beatrice Ubaldi a su pianoforte e de Arianna Melis chi at a cantare is petzos boddidos dae su repertòriu de s’artista americanu e dae su film dedicadu a issu etotu in su 2004.

 Is atores Tiziana Murino e Antonio Ghironi imbetzes ant a acumpangiare is presentes in intro de sa vida de su musitzista, faghende torrare a bìvere, in manera ideale, is fatos de sa vida sua. Una vida tribulada, ma peri fortunosa fata de resurtados e de èsitos bonos, de biàgios e de emotziones. Totu cosas chi is duos Assòtzios ant a trasmìtere a sa gente gràtzias a is chimbe artistas chi ant a pònnere a disponimentu sa boghe e is istrumentos issoro pro fàghere un’ispetàculu chi no at a iscarèschere mai.

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22