Tesones in su Gulfu Persico, arriscant sas bendidas sardas in sos Paisos de sa zura.

Sas tesones intre s’Iran e atteros paisos de su Gulfu podent tennere effettos fintzas supra s’accolomia de sa Sardigna. Su problema no est solu po su pretziu de s’energia ma fintzas pro sas bendidas de sas dittas sardas in forastigu. Un’istudiu de Confindustria Sardigna narat chi una parte importante de su negossiu cun custos Paisos diat podere minimare.

In sos urtimos annos sos Istados chi sunt in su Gulfu Persico sunt divennidos unu de sos mercados printzipales pro sa dittas de s’isula, pustis de sos Istados Unidos e s’Ispagna. Una parte importante de sas mertzes sardas bendidas in forastigu finint propriu in cussa zura e sa parte prus manna est de produttos divressos dae su petroliu. Custu mustrat cantu su Gulfu siat unu mercadu importante pro s’accolomia regionale. Sa parte de produttos sardos pro custos Paisos est meda prus arta in cunfrontu a sa media italiana, cunfirmande chi s’isula est prus esposta de atteras regiones a sas difficultades de su negossiu in cussa zura.

Intre sos clientes printzipales bi sunt Arabia Saudita e Bahrein, sighidos dae Emirati Arabi Uniti. Fintzas su Qatar addurat unu mercadu de signifficu pro medas dittas sardas. Intre sos campos prus interessados bi sunt cussu de sa produssione industriale e cussu chimicu, chi in sos urtimos annosa ant bendidu una parte manna de sos produttos insoro in sos Paisos de su Gulfu. Unu rolu importante lu tenent fintzas sas dittas chi produent macchinarios e cussas chi tribagliant sa pedra.

Si sas tesones de sa zura diant deppere accreschere e faghere divennere prus diffitzile su negossiu, una parte de custa bendidas si diat podere minimare cun cosseguentzias pro divressas dittas de s’isula. Sas difficultades in sa colada de sas naves o problemas intre sos Istados de sa zura diant podere abbaccare su trafficu de sas mertzes e faghere divennere prus diffitziles sos negossios. Pro medas dittas sardas, custos mercados sunt divennidos in su tempus unu puntu de relata importante. Una minimada de sas bendidas diat podere duncas gravare supra sos risurtados de sas dittas e tennere effettos fintzas supra s’occupassione e sos imbestimentos.

Pro custu sa situassione in su Gulfu benit sighida cun attentzione meda fintzas in Sardigna. S’accreschimentu de sa crisi diat podere difattis influentzare non solu sos pretzios de s’energia ma fintzas sos appitzigos de sos negossios fraigados in sos annos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Dinamo Sassari derretta dae Reggio Emilia, divenit prus diffitzile arribare intre sas primas.

Amargura pro sa Dinamo Sassari chi perdet contra su Reggio Emilia pustis de una partida chi pariat sutta de controllu. S’isquadra tattaresa est bistada in daenantis in sos puntos casi po tottu sa partida e a unu tzertu puntu at tentu fintzas unu vantazu mannu. In sos urtimos minudos peroe sos istranzos sunt resessidos a passare in daenantis e binchere.

Sa derretta pesat mescamente pro sa classifica. Si sa Dinamo epperet binchidu diat aere fattu unu passu importante meda pro si accostare a sas primas isquadras de su campionadu. Invetzes cun custu risurtadu sa carrela divenit prus cumplicada e sa distanztia dae sas primas de sa classifica creschet. Pro bona parte de sa partida s’isquadra de Tattari at giogadu bene. At acciappidu canisteddos cun fatzilidade e est resessida a fraigare unu vantaggiu bonu. Su pubbricu de su PalaSerradimigni at agguantadu s’isquadra isperande in d’unu sutzessu chi podiat battire cunfiantza pro sa fine de s’istajone.

In sos urtimos minutos peroe, sa situassione est cambiada. Reggio Emiliaat incumintzadu e recuberare puntu subra puntu mentres sa Dinamo at perdidu unu pagu de siguresa. Carchi assione no est andata bene e sos istranzos nde ant approfittadu pro si accostare semper de prus in sos puntos fintzas a binchere sos tattaresos in su finale.

Intre sos giogadores de sa Dinamo unu de sos menzus est bistadu Desure Buie chi at sinzadu puntos meda e d’est bistadu pro parizzu tempus su puntu de relata de s’isquadra in attaccu. Cando peroe est bistadu cambiadu pro si pasare un’appena su giogu de sa Dinamo at abbaccadu e s’isquadra at tentu problemas a acciappare solutziones novas. Una cosa positiva est arribada dae sa torrada in campu de Marshall pustis meda tempus de assentzia pro problemas fisigos. Su giogadore at incumintzadu bene sa partida sinzande duos tiros importantes dae attesu.

Dae s’attera parte Reggio Emilia at sighidu a bi creere fintzas a sa fine. Carchi giogadore suo at acciappidu canisteddos importantes in sos mamentos detzisivos e s’isquadra est resessida a binchere una partida chi pariat giai perdida. Pro sa Dinamo addurat duncas delusione meda. Pro meda tempus s’isquadra aiat mustradu de podere binchere ma in sos urtimos minutos est cambiadu tottu. Est una de cussas partidas chi dassant delusione pro itte su sutzessu fuit deabberu accanta.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22