Noe annos faghet, a bintiduos annos ebbia, est mortu Luigi Doneddu. Cada annu, a printzipiare dae cussa die maladita, is amigos de s’assòtziu isportivu “Sa Tèulaù” ddu regordant cun unu Memorial ispetziale in Biddamanna. Sa manifestatzione est assotziada a unu torneu de pallavolo meda cumbatidu chi at bidu sa partetzipatzione de dòaghi iscuadras (eterogèneas dae totu s’Ogiastra e dae sa Barbagia) cumbàtere pro bìnchere su trofeu dedicadu a s’amigu Luigi.

Su torneu 2012 est acabadu domìniga 26 de austu cun una finale chi at poderadu is ispetadores cun su cunnu in bràgias pro totu sa partida. A si cuntèndere su primadu in custa serada particulare sunt istadas is iscuadras ogiastrinas “Pane & Dolce e “Ciao, semplicemente ciao” in una fòrmula de “ses pro ses mesturas”. Sa binchidora est istada s’iscuadra tortoliesa de “Pane e Dolce” ghiada dae Luca Usai, chi tra emotziones e unu tene pro tene sighidu, at bìnchidu a s’iscuadra de Davide Fancello. A sa fine de sa partida sunt istados donados finas is prèmios individuales a is atletas chi si sunt fatos notare pro s’abilesa e sa balentia issoro: su  mègius giogadore, Davide Fancello; su mègius pallegiadore, Antonio Melis; sa mègius Giogadora, Maria Rosa Mulas; sa mègius Muru, Marco Meloni; su mègius atacu, Enrico Angius. Is organizadores, Francesco Vitale, Rita Agus, Alessandra Giaccu e Chiara Melis, ant torradu gràtzias a totu cussos chi peri ocannu ant agiudadu a fàghere unu torneu ispetziale e bene fatu in regodu de Luigi Doneddu, amigu istimadu e lastimadu dae totus. S’adòbiu est duncas pro s’annu chi benit, pro torrare a intregare su trofeu a is binchidores  noos. A mègius bìdere Luigi!
Pane & Dolce – Ciao Semplicemente ciao ( 3-2)

PANE & DOLCE: Federica Cocco, Maria Rosa Mulas, Luca Usai, Irene Pili, Marco Meloni, Francesco Rassu, Luca Contu, Enrico Angius, Valentina Monni

CIAO SEMPLICEMENTE CIAO: Beatrice Staffa, Monica Congiu, Davide Fancello, Antonio Melis, Andrea Lai, Giovanna Ciuffreda

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”