Ant a abarrare abertas finas a su 30 de onniasantu in iscritziones a is cursos pro sa segunda editzione de su progetu IMPARI’S, initziativa promòvida dae s’Assessoradu regionale a s’Agricultura pro sa formatzione de is operadores econòmicos de s’àera GAL, Grupu de Atzione Locale nàschidu cun sa punna de favorèssere s’isvilupu de is àeras rurales. A is cursos, criados pro more de afortiare sa “capatzidade progetuale e imprenditoriale de is operadores econòmicos de is territòrios leader”, podent leare parte is titulares de is atividades econòmicas o unu de is familiares issoro, sòtzios o dipendentes. Ant a èssere aparitzados is sighentes percursos de formatzione: Agricultura Sotziale, Ospitalidade e Paesàgiu Rurale, Multifuntzionalidade de s’Azienda Agrìcula, Produtziones Agroalimentares e Artisanale de calidade e leader pro fàghere  “rete”. Cada cursu at a durare 52 oras e sunt prevìdidos finas biàgios formativos pro su 50% de is partetzipantes. Chie cheret leare parte a is cursos depet intregare sa dimanda de pre-iscritzione in is ufìtzios de su GAL, pro mèdiu de racumandada o cun sa posta ordinària a s’indiritzu: GAL Ogliastra Bia de Grazia Deledda n. 2 08040 Elini (OG) opuru podet cunsignare sa dimanda a manu a su matessi indiritzu.

Totus is interessados sunt invitados a cuntatare  su FORMEZ PA, a is nùmeros 070 67956 259 – 07067956221.

Pro àteras informatziones

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22