Peri ocannu s’at a torrare a fàghere su torneu istadiale de Pallavolo de plàia, s’eventu prus isetadu de s’istade. Su campionadu, nàschidu dae s’initziativa de is amantiosos de custu isport chi cada istade prenent is campos a probe de mare, est diventadu un’adòbiu de grandu interessu pro professionistas e apassionados de  s’Ogiastra e finas de sa Barbàgia. Medas is iscuadras prontas a s’afrontare cada sero in su campu isportivu de Gelisuli, tra làgrimas e suore, regalende a is ispetadores ispàssiu e disaogu.

S’adòbiu isportivu, lòmpidu giai a sa de chimbe editzione, cheret cummemorare sa bonànima de  Fabio Pitzalis. Su torneu si displigat segundu sa fòrmula de su 4X4 mistu, e apenas incumentzadu faghet a bìdere is primos ispantos. Giai dae is primas iscutas su livellu si presentat giai artu gràtzias a sa partetzipatzione de unu muntone de veteranos acostagiados dae medas giovànos de bonas promissas. Custa cumpetitzione ogna sero at a regalare a is ispetadores oras de emotzione e de bonu isport, ma is mègius iscuadras ddas amus a pòdere bìdere petzi  tra su 9 e su 10, est a nàrrere in sa fase preliminare de su torneu, ocannu articulada in cunforma a sa modalidade clàssica de su girone a s’italiana. In sa prima fase de sa gara s’ant a afrontare duas iscuadras chi ant iscaladu sa classìfica in pagu tempus, sa “Turismar” de Luca Ammendola e Alessio Aresu e sa nuorese “Socrates” de Franco Filia, chi pròpiu eris sero si sunt afrontadas pro prima bia in su campu e nois de Vistanet amus cumpudadu sa partida in contu bostu. Custa sa crònaca:

Pagos faeddos a in antis de s’adòbiu, petzi cuntzentratzione e mudìmene. Ognunu ischet ca non podet fàghere faddina. Puntos fatos a sa renfrusa chi s’intrèvenant a ischiatzadas chi ispantant su pùblicu. Sa potèntzia fìsica de su foramanu de s’iscuadra de is “Socrates” faghet tìmere a totus, francu a su muru de sa “Turismar”,  ordinadu e eficatze, denneghende unu muntone de puntos a is aversàrios e faghende∙nde totalizare àteros pro issos etotu. E cando s’iscuadra s’agatat apretada, mescamente in sa serrada de su set, Ammendola est capassu de pigare a sa manu s’iscuadra e de leare a domo su resurtadu. Cando in fatu sa fortza non bastat prus tando is duas iscuadras incumentzant a giogare cun malìtzia, cun mòvias farsas e pallonetos: est tando chi initziat s’ispetàculu. Cun grandu acòrdiu tra s’artziadore e s’ischiatzadore de is “Socrates”, is nugoresos mustrant s’atza issoro e renessent a agatare is fortzas chi crediant de àere ispatzadu: su segundu set est s’issoro.  Immoe non si podet fàghere perunu isbàlliu e totus dd’ischent. Su suore calat a istidda a istidda, is mùsculos sunt istrirados finas su màssimu ma nemos intendet s’istrachesa pro ite niunu bolet pèrdere; pagos faeddos in s’ora de pasu de su time out, petzi isprenetu e atza meda. Tra is duas iscuadras immoe est gherra aberta. Pallonetos, bòtzas segadas e piatzadas e sa “Turismar” nche isciaddet in un’ibitu a is aversàrios. Sa lòmpida est indedda e ischent de dda pòdere aguantare. Cumandados dae Ammendola, is cumpàngios boddint unu puntu fatu a s’àteru e concruent sa partida leande∙si a domo duos puntos  chi ddis faghent balangiare su primu posti in sa classìfica.

Sa cuntentesa de is binchidores però no est meda. Difatis ischent chi su torneu est galu longu e chi in custu isport su resurtadu si podet furriare in deretura. Bos amus a ischire finas de is àteros adòbios.  Pro como sa classìfica est custa:

SCUADRA    PUNTOS

Turismar    15

Socrates    13

Serra Ceramiche    13

Frailis Animazione    12

Eureka    9

Marmock Beach    9

La Baia    7

Titanic    0

Falegnameria Pani    0

---

© RIPRODUZIONE RISERVATA

Nule e s’arte de su tessere: un’identidade chi leat forma intre connottu e tempus benidore.

In su coro de sa Costera, Nule, paisu de casi 1.300 abitantes, seperat de contare issu mattessi po mesu po mesu de una de sas cosas prus berteras: sa tessidura. Dae su 20 de Nadale 2025 a su 31 de Bennarzu 2026 su tzentru si faghet logu de contassia e de creazione cun sa mustra”T’essere-esistere,non finito,finito” unu disignu culturale chi ponet a su tzentru su tribagliu, sa bisione e sa memoria de sas mastras tessidoras de Nule.

Sa rassigna est curada dae s’architetto Angelo Ziranu e naschet dae sa voluntade de s’amministratzione comunale po balorizzare su patrimoniu de s’identidade de su paisu po mesu de unu percursu chi aunit connottu, tempos de oe e afficcos de isviluppu. Sa tessidura benit proposta non solu commente espressione artistica, ma commente seperu de vida, pratiga de donzi die e ischire chi sighit a si rennoare in su tempus.

Su coro de su disignu est mustradu dae su tribagliu de sas tessidoras intro de un’istanzia-museu cun d’unu telarzu, pensada commente istallatzione abbarrante e a su mattessi tempus attivu. Non unu logu frimmu, ma una buttega abberta, unu “work in progress”  in su cale su gestu artesanu si mustrat in sa bertera sua, divenninde esperientzia biva po su pubbricu. Su telarzu, istrumentu chi contat, divenit gai logu de contu e de relatta, capatze de torrare su balore fungudu de su faghere.

Sa mustra comunicat in manera deretta e moderna sa possibilidade de cussiderare sa tessidura commente unu tribagliu fintzas oe, unu caminu possibile po chie disizzat de si accostare a custu mestieri commente seperu de vida. Intre su tempus de sa mustra sos bisitadores ant a podere sighire sa naschida de su tappettu “non finidu”, castiande sa creschida de donzi die sutta sas manos de sas artesanas, fintzas a s’accabbada sua, cando su fattu a manu “finidu” at a divennere sintesi bisiva e ideale de su disignu intreu.

Intre sos intentos tzentrales de sa mustra bi est puru cussu de affortigare sa visibilidade de su tappettu de Nule e de sas tessidoras suas a livellu nazionale e internatzionale. Sa rassigna est accumpanzada dae unu calendariu prenu de appuntamentos chi attraessat sas festas e s’incumintzu de s’annu novu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22