Chenàbura 10 de làmpadas Mimmo Lerede at chèrfiu festare s’eletzione sua a sa càrrigu de sìndigu de Tortolì cun una festa in sa pratza de s’hotel “S’abba de sa Murta”, unu istàulu antigu  tra Tortolì e Barì trasformadu dae s’architeto Mimmo Pisu in albergu de su sartu.

Gràtzias a s’agiudu de unos amigos espertos in su setore gastronòmicu, est istadu possìbile aparitzare una bella chena, in ue su nuscu de sa petza a arrustu at acumpangiadu sa festa cun prus de chimbechentos invitados. Espertos de coghina, coghineris de professione e finas coghineris improvisados ant cotu e segadu sa petza, mentres is giòvanos camereris ant provididu a nche portare su màndigu a is mesas.

Su sìndigu nou, Mimmo Lerede, invitadu a allegare dae is cumbidados a sa chena, nch’est pigadu a pitzu de un’imperartu e at saludadu is presentes presentende finas is membros de sa giunta sua chi pro chimbe annos ant a acumprire su programma polìticu pro Tortolì e Àrbatax. Su sìndigu at retzidu is complimentos e is augùrios de bonu traballu dae is amigos e finas dae is cuncurrentes polìticos de totu is partidos. A merie ant segadu e donadu sa turta, acumpangiada dae binu bonu in cantidade, mentras in su palcu si sunt esibidos cantantes e ballerinas chi at intratènnidu is òspites finas a note manna.

Chircas in cursu in Sardigna pro Elia Del Grande, s’òmine chi in su 1998 at isterminadu sa famìlia in su Varesotu.

Sighint in Sardigna sas chircas de Elia Del Grande, s’òmine chi in su 1998 at bochidu su babbu, sa mamma e su frade in sa domo de famìlia a Cadrezzate, in sa provìntzia de Varese. A pustis de àere pagadu sa pena pro su mortorzu triplu, Del Grande fiat istranzu de sa presone de Castelfranco Emilia (Mòdena), in ue si nch’agataiat pro resones de seguresa e ca lu cunsideraiant ancora perigulosu pro sa sotziedade.

Segundu sa politzia s’òmine diat èssere lòmpidu a fuire calendesi dae su muru de tanca de s’istrutura penitenziària impreande una corda fatta cun filos elètricos. Dae sa notte de s’evasione, sas fortzas de s’òrdine ant cumintzadu una operatzione manna de chirca, allargada como fintzas in Sardigna, in ue si creet chi siat bennidu o tènzat cuntatos.

Su Dipartimentu de s’amministratzione penitenziària at dispostu una chirca interna pro ischirriare comente siat istadu possìbile chi unu presoneri cussideradu perigulosu siat lòmpidu a ischivare sa sorveglianza in una istrutura de seguresa mèdia. Elia Del Grande, oe de 49 annos, est devènnidu tristemente connotu pro cussa chi sos medios de comunicatzione ant torradu a narare s’istrage de sos forneris. Su 7 de bennàrzu de su 1998, a s’edade de 22 annos, at bochidu sos genitores suos e su frade mannu, cun su cale manizaiat una panificatzione de famìlia. A pustis de su delitu est fuidu in Isvìtzera, ma est istadu frimmadu pagas dies a pustis e at cunfessadu in presse su chi fit acontèssidu.

Cundennadu in Appellu a 30 annos de presone cun su reconnoschimentu de sa semi- infermitade mentale, Del Grande at passadu in presone 25 annos in antis de èssere tramudadu in d’una istrutura cun vigilàntzia iscainada. Sas fortzas de s’òrdine cussizant sa massima abbistesa e a sinnalare cale si siat possìbile abbistamentu s’obietivu est agatare su fuidu in su prus pagu tempu possìbile e accrarare sas circumstàntzias de s’evasione.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”