Cras, martis 12 de làmpadas, sa mustra de arte intitulada “Is mannos de s’arte contemporànea” (I big dell’arte contemporanea) at a acollire tres òperas de su pintore tortoliesu Sergio Muntoni: “Sa mirada de su massau” (Lo sguardo del contadino), “Traballadura de su casu” (Lavorazione del formaggio) e “Regoglidore de fenu” (Raccoglitore di fieno). Tres òperas fideles a sa temàtica preferida dae s’artista, cussa de s’ambiente e de su recùberu de is artes e de is traballos antigos. Sa mustra, chi at a durare finas a su 18 de làmpadas, at a ospitare is òperas de is mègius artistas de s’iscena italiana e at a èssere acumpangiada dae unu calendàriu ricu de adòbios culturales. Ant a èssere presentes òspites de onore comente su conte Daniele Rodaini Tedeschi e Romina Power, chi at a partètzipare comente madrina e comente artista. Sa rassigna s’at a tènnere in su cumplessu museale  de Pratza de su Pòpulu in Roma: sa Galleria L’agostiniana. Gràtzias a sa proposta de s’artista tortoliesu, is organizadores ant atzetadu de fàghere esibire in sa mustra a su Tenore de Silanus Santu Laritu. Un’ocasione bona pro fàghere connòschere is traditziones de sa terra nostra.

Dae pagu unu istòricu de s’arte famadu, G. Folco, at iscritu custu pro Muntoni: “In su realismu figurativu de Sergio Muntoni, si cumprendet totu s’amore chi issu tenet pro sa natura, pro sa terra e pro sa traditzione. Manna sa capatzidade sua de torrare a pintare cada piessignu òticu de su totale e de su particolare, subraponende tonos e colores, isfumende is uros pro cullunare s’ispàtziu e pro creare profundidade. Una pintura màstrina e fine, chi in su figurativu agatat s’essèntzia de s’arte berdadera, de su traballu, de su pintare pro su praghere de fàghere arte e non pro ispantare pro fortza”.

Sergio Muntoni, in partèntzia pro Roma nos at naradu: “Soe orgolliosu de èssere istadu cuntatadu pro custa espositzione. Is òperas mias, difatis, sunt istadas seletzionadas dae una commissione de espertos mannos de su setore e ant a agatare tretu a costàgiu de artistas chi deo ammiro meda. Pro mie est un’onore”.  Gràtzias a Sergio Muntoni sa Sardigna at a èssere rapresentada finas in Roma. Complimentos corales a su mastru!

Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22