Casteddu in derettura de su tempus benidore: su Puc novu po una tzittade pius birde, agguantada e incluidiva.

Su Comune de Casteddu at presentadu in manera uffitziale su Pianu Urbanisticu Comunale ( PUC) , un’ istrumentu de fundamentu po ghiare s’isviluppu de sa tzittade in sos deghe annos benidores, cun s’intentu de la faghere divennere pius birde, agguantada e incluidiva. Sa Presentazione est bistada fatta in su Palattu Bacaredda e sinzat unu momentu detzisivu in su percursu chi che est leande sa tzittade assa parte de su disignu de su tempus benidore sou trassadu dae s’ amministratzione ghiada dae su sindicu Massimo Zedda.

Intre sos disignos printzipales de su Pianu bi sunt interventos importantes destinados a revertire sas zuras pius importantes e populares de sa tzittade. Attentzione meda at essere riservada a su lungomare Sant’Elia e Marina Piccola chi ant a divennere logos de unione, cultura e turismu agguantabile.

Ant essere balorizzados puru su Parco Dei Colli de Tuvixeddu- Tuvumannu e sa zura de Terramaini, cun interventos po allogare e favoressere su patrimoniu naturale e archeologicu. Su PUC prevedit puru interventos in sos cuarteris de Is Mirrionis, San Michele e Pirri, cun s’intentu de mezzorare sa calidade de sa vida de sos chi bi istant, e accreschere sos servizios pubbricos e creare logos birdes chi serbant po tottus.

Sa bista de tottu su pianu pensat a unu ecchilibriu intre rispettu de s’ambiente, balorizzazione de su patrimonio istoricu e agguantu de sa tzittade. Intre sos istrumentos novos si bient su Laboratoriu de Ecologia Urbana e s’ Atlante de sos cuarteris, chi ant a permittere unu disignu pius pretzisu, fundadu supra datos, e pius accanta a sas esigentzias reales de sa comunidade . In custa manera, Casteddu si preparat a divennere una tzittade modellu de progressu urbanu e partecipatzione tzivica, inube donzi seperu de organizatzione dat unu contribbudu po fraigare unu tempus benidore pius agguantadu e incluidivu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22