S’apretu veterinàriu est passadu: non b’at àteros focolajos de dermatite nodulare in Tàtari.

Sa Asl de Tàtari est resurtada a nd’istudare sos focolajos de dermatite nodulare bovina in su nord-ovest de Sardigna. In sos ùrtimos tres meses ant mortu 725 pegos de bestiàmene bùbulu e eliminadu 9 focolajos de dermatite nodulare bovina registrados in su territòriu de sa Asl de Tàtari, intre Benetuti, Bono, Bòtidda e Su Burgu, comunes a curtzu a su grupu originàriu de sa provìntzia de Nùgoro.

In custas dies sunt finidas sas operatziones pro eliminare sos focolajos, ochiende e faghende isparire su bestiàmene malàidu, bonifichende e disinfetende su logu e sighende a vatzinare sos pegos. S’atividade at impignadu sos Servìtzios veterinàrios de su Dipartimentu de preventzione veterinària de su Nord de Sardigna chi, in pagu tempus e cun tantasdificultades, sunt resurtados a imbàtere a sos obietivos prevididos dae su Pranu regionale, mustrende capatzidades professionales e umanas de primore, importantes meda in un’emergèntzia de custu tipu. S’Azienda at postu a disponimentu dinari meda pro garantire custas atividades e, in sas dies chi benint, at a licuidare a sos allevadores sas indennidades cumpensativas pro su bestiàmene mortu.

Sas leges europeas e italianas previdint, pro chi su virus non s’ispargat e pro fàghere isparire sa maladia, tres atziones indispensàbiles: sa gherra a sos insetos chi la càusant, s’eliminatzione de sos focolajos e sa vatzinatzione de emergèntzia. Dae sa fine de su mese de trìulas a oe su bestiàmene vatzinadu est prus o mancu de 50.000 pegos in 1.647 aziendas, chi currispondet a s’88% de sos pegos e a su 92% de sas aziendas.

Su vatzinu paret chi siat seguru e chi fatzat efetu e in veridade at blocadu sa difusione de su virus. Sa campagna de vatzinos est ancora in atu e si pensat de finire intro sa data prevista de su 20 de cabudanni. S’atividade est istada ispantosa, un’impresa titànica fata dae sos servìtzios de sa Asl,
chi tocat de ringratziare in manera particulare.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”

Su chervu sardu cona de una torrata a nachere de s’ambiente.

Su chervu sardu, connoschidu iscientificamente commente Cervus elaphus corsicanus, est una de sas castas pius ammaghiantes e de signifficu de sos animales de sa Sardigna. Tippicu de s’isula e de sa Corsica, custu animale si annodittat po sas mesuras prus pitticcas in cunfrontu a su chervu europeu e po su abbrigu fuscu chi cambiat tonalidade cun sas istajones. Po seculos at bividu in sos buscos e in sas magras mediterraneas de s’isula diveninde parte de sa bista naturale e de sa cultura locale.

In su Noighentos su chervu sardu at arriscadu de si estinghere pro more de sa cazza estremada e de sa minimada de sos logos in sos cales biviat. A sa fine de sos annos Sessanta nde adduraiant solu pagas chentinaias de tipos cuncentrados mescamente in sa parte de bassu de s’isula. Dae cussu mamentu sunt bistados incumintzados programmas importantes meda de tutela e accreschimentu chi ant permittidu a s’ispecie de torrare a occupare zuras mannas de sa Sardigna.

Oe su chervu sardu est presente in medas zuras de sos montes e corongias commente su Sulcis,su Sarrabus,S’Ozzastra e su Gennargentu. Bivet in logos riccos de buscos de elighes e magras mediterraneas, inube agattat furriadorzu e cosa de pappare. Pappat meda erba, fozzas,chimizones e fruttos,isboddiande unu rolu de fundamentu in s’ecchilibriu de sos ecosistemas forestales.

Una de sas cosas pius ammaghiantes de sa vida de su chervu sardu est su tempus de sos amores chi est in attonzu. In custa fase sos mascros bogant a fora boghes potentes po giammare sas feminas e appartare sos atteros mascros. Custu fenomenu nadurale faghet arrivare donz’annu appassionados e istudiosos, apparande un’ispettaculu unicu in sos buscos sardos, de cuntattu mannu.

Sa torrada de su chervu sardu no est solu unu sutzessu biologicu, ma puru unu signale importante po cunservare s’ambiente. Sa presentzia sua cunfirmat sa salude bona de sos ecosistemas e dat unu contribbudu a sa balorizzatzione su patrimoniu naturale de s’isula. In medas zuras su chervu est divennidu fintzas unu elementu de attrassione po su turismu naturalisticu e de ecchilibriu ecologicu. Subra de custa ispecie sunt bistados pubbricados puru paritzos libros fotogiornalisticos dae domos sardas chi lu cheriant evidentziare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22