Tortolì e le festas de Sartu: fide, connottu e comunidade in sas campagnas de s’Ozzastra.

Donzi annu, intre sa terza dominiga de austu e sa secunda de Cabudanne, Tortolì tzelebrat sas Festas de Sartu, sas festas de campagna de su
connottu in onore de sos santos benerados in sas tres cresias de campagna dedicadas a santu Lussurzu, Santu Gemiliano e a su santissimu
Sarbadore. Si trattat de tres appuntamentos chi ponent impare devossione,ritos antigos e momentos de comunidade, manteninde bivu unu connottu chi affundat sas raighinas in sos seculos.

Su calendariu de sas tzelebrassiones sighit un’ordine pretzisu meda: sa festa de santu Lussurzu est sa terza dominiga de austu, cussa de san Gemiliano est s’urtima dominiga de austu o sa prima de cabudanni;po finire sa festa de su santissimu Sarbadore est sa secunda dominica de cabudanni. Po donzi appuntamentu benit eleggidu unu comitadu ordiminzadore, chi tenet s’incarrigu de regollere dinari- sa gicca- e preparare sa festa religiosa e tzivile.

Elementu chi distinghet sas Festas de su Sartu est s’imbidu, de issida ispagnola e unicu in Sardigna, chi si rennovat donzi annu sa chenapura sero in su tzentru istoricu de Tortolì, in daenanti de sa cresia de sant’Andria. Inoghe si faghet una bera e propia asta pubbrica: inube in palu bi est su giuali, su giuale de linna destinadu a ponnere umpare sos boes chi ant a trasinare su cocciu cun s’istatua de su santu.

Chie binchet s’asta, giammadu s’imbidadori, at a tennere s’onore de ghiare su bultu finzas a sa cresiedda de campagna dedicada a su santu. Su sero de sappadu, preparadu su cocciu e allorados sos boes, partit sa proffiscione sulenne. Partinde dae sa cresia de sant’Andria, su bultu de su santu benit leadu fintzas a sa cresia de campagna,bardiadu dae sos setzidores e sighidu dae sa comunidade. Sighint sos affestamentos populares cun musica, cantos e ballos de su connottu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Mario Pes: sa Sardigna contada po mesu de sa mirada de s’arte fottograffica.

Merculis 18 de frearzu su SEARCH de Casteddu at avviadu una mustra dedicada a Mario Pes, frigura tzentrale de sa fottograffia sarda de su Noighentos, capatze de fundere dilighesa artistica e asserva sotziale. Sa mustra sinzat su cuccurale de su disignu incumintzadu in Nugoro in S’Ispatziu Ilisso e isfroscadu in sos urtimos meses cun abbenimentos editoriales e cun films, chi ant ghiradu s’attentzione de sa critiga e pubbrica supra unu mastru de sa cultura bisiva isulana.

Intitulada “Mario Pes. Sa Sardigna intre connottu e modernidade”, sa mustra apparat una bista de mandu supra sa tzittade de Casteddu e s’iscrocca sua,repessados po mesu de s’obbiettivu de un’artista chi revertiat donzi iscena de sa die in cumposissione bisiva.

Prus de 200 friguras, medas in mesura manna, ghirant logos de sa tzittade e de sas lacanas, caras, architetturas e logos de tribagliu cun d’una fortza poetica chi andat prus a daenantis de sa simple documentassione. Donzi fottograffia est unu resumene de geometria, lughe e aera, un’echhilibriu intre castiada reale e bisione de bellesa. Sa fottograffia de Pes mi movet donzi mamentu supra s’affrontadura intre arte e cronaga.

Sa mirada sua abbizosa a sas tesones sotziales de sa tzittade, divenit limbazu bisivu, capatze de ghirare s’umanidade e operosidade chi animant sa Sardigna de s’incumintzu de su Noighentos. Importantzia particulare tenet su contu de sos logos de tribagliu, incluidinde s’esperientzia de sas feminas, ghirada cun delicadesa e rispettu, chentza discursos ma chin seru artisticu fungudu.

S’allestimentu, curadu dae s’architetto Antonello Cuccu,amplariat sa fortza poetica de sas friguras e cumbidat su bisitadore a s’affundare in su logu fottografficu, a si firmare e attibbire sa mesura de sa bellesa de sos logos fottograffados dae Pes. Sa mustra prevedit bisitas ghiadas, buttegas didatticas e devuccamentos po accumpanzare su pubbricu in d’unu caminu chi faghet attibbire e chi est prenu de cultura fintzas a su 4 de aprile 2026.

Po accabbare s’esperientzia, su docufilm iscrittu e setadu dae Enrico Pinna, torrat in daesegus sa coerentzia artistiga e s’indipendentzia de su pensamentu de su fottograffu intrintzinde sa muda pessonale e s’istoria cumone.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22