Jersu e Ulassa donant su benebènnidu a su mese de austu cun unu cartellone prenu de eventos. Difatis, su 4 de austu, at a cumentzare su “Fèstival de is Tacus”, manifestatzione isetada dae is amantiosos de su teatru de totu sa Sardigna e finas de Itàlia. Is dansas ant a èssere abertas dae s’Iscola de artes iscènicas “La Vetrera”, cun s’ispetàculu “Caramore”, èsitu iscènicu de su laboratòriu dirigidu dae Alessandro Mascia, Mario Madeddu, Giorgio Del Rio e Manuel Cossu. A is 21.30, is ispetadores ant a leare is màchinas issoro pro lòmpere a sa Cantina Sotziale “Antichi Poderi” de Jerzu. A ddos isetare ant a agatare su cuntzertu de  is “Gatti Mezzi”, chi ant a presentare su de bator album issoro intituladu “Belve fra le belve”.

Domìniga 5 de austu in sa sala de su Consìgiu Cominale de Jersu, Giacomo Mameli, giornalista e sotziòlogu de Foghesu, at a presentare s’òpera sua de su 2012 intitulada “Sardo sono”. A is 21.30 a nche pigare a pitzu de su palcuscènicu ant a èssere Tommaso Novi e is atores de su Cada Die Teatru chi ant a presentare “Marea, la vita ad ogni respiro”.

Ispassiosa peri sa chida imbeniente: su 6 de austu, a is oras 17.00, sa cumpangia “Giarasolo” at a presentare a su pùblicu ulassesu s’ispetàculu de “clawnerie”  intituladu “Il tesoro del mago Bakù”. Duas oras a pustis at a èssere su turnu de su Cada Die e de sa Cumpangia Alchimia, chi in Jersu ant a andare in iscena in paris cun s’òpera intitulada “Più veloce del raglio”. A is 21.30 de sa matessi die s’atrice teatrale Laura Curino at a presentare su monòlogo suo de su 1996 cun su tìtulu “Olivetti”. A serrare sa serada, donende sa bonanote a totus is presentes, ant a èssere is “Gatti Màzzi” e sa cumpangia “Guascone Teatro” cun su traballu issoro “Lasciami…capire tutto in una notte”.

Martis 7 austu, a is oras 17.00, Ulassa s’at a prènnere de alligria e de bivesa gràtzias a is pipios de sa bidda chi ant a portare in iscena su traballu teatrale intituladu “Il pastorello e la capretta”, dirighidu dae Silvestro Ziccardi pro sa cumpangia “La Casa delle inquietudini”. A is 19.00 is atores minoreddos ant a lassare s’iscena a is collegas prus mannos de sa Cumpangia Rossolevante, chi ant a presentare a su pùblicu de sa Pratza Barigau su traballu nou issoro intituladu “Stop making sense”, mentras a is 21.30 in s’Istatzione de s’Arte s’at a tènnere s’esibitzione de s’atore calabresu Peppino Mazzotta cun “Radio Argocreazione”. Mercùris 8 de austu is amantiosos de su teatru ant a tènnere finas àteros ispantos: a is 17.00, in su Padente de Sant’Antoni de Jersu, s’Iscola de Artes Iscènicas “La Vetreria”, at a presentare s’ìncipit in pitzu de Pier Paolo Pasolini, èsitu iscènicu de su laboratòriu “Cuori di panna” dirigidu dae Mauro Mou e Alessandro Lay. A is oras 19.00 in sa sala de Pratza Barigau de Ulassa at a andare in iscena “È colpa tua”, de Francesco Abate, Marco Noce e Matteo Sau, mentras a is 21.30 is ispetadores ant a dèpere andare a sa Cantina “Antichi Poderi” de Jersu, in ue ddos at a isetare s’atore Dario Vergassola cun s’ispetàculu “Sparla con me”. Gioja 9 austu, ùrtima die de sa rassigna, is bisitadores ant a pòdere assìstire a su laboratòriu de narratzione dirigidu dae Laura Curino, in su bellu iscènàriu de su Padente de Sant’Antoni de Jersu. S’adòbiu est fissadu pro is 17.00. Is noas, però, non sunt galu acabadas: a is 19.00, sa cumpangia de Casteddu “Il Crogiuolo” at a presentare “Gene mangia gene”. In segus ddoe at a èssere s’ispetàculu de  Gavino Murgia e de su “Cada Die teatru” chi ant a concruire su cartellone de acontessìmentos de su Fèstival de is Tacus. Su programma de sa rassigna est duncas prena de eventos e de emotziones. Bida sa bona resèssida de is annos colados, semus seguros chi niunu at a abarrare delusu. Cunsigìamus a totus de non mancare!

Sas isulas de sa Sardigna pius famadas , cantas e cales sunt.

Sas “isulas de s’isula” Carloforte, sant’Antiogu, Sa Madalena, Caprera, Sant’Istevene, Spargi, Budelli e Razzoli, costoini donzuna un’identidade distinta, intritzande nadura e connottu chi faghent divennere unica tottu s’iscrocca de sa Sardigna.

Carloforte e santAntiogu, attesu dae sa costa sud occidentale,frommant s’arcipelago de su Sulcis. Sant’Antiogu est s’isula sarda pius manna, collegada a sa terra dae unu terrinu artifiziale. Inoghe bivent impare mare e istoria: colonia antiga de sos Fenicios, pustis de Cartagine e romana,cunservat testimonzas archeologicas de valore mannu, in mesu de sas calet bi sunt sas necropolis e su thopet.Pagu pius attesu bi est Carloforte, s’unica tzittade de s’isula de santu Predu, fundada in su seculu VXIII dae familias de sa Liguria chi arribaiant dae Tabarca, in Tunisia. Sa limba tabarchina, faeddada a dies de oe est una de sas cosas pius faschinosas de s’isula,imparis a sa coghina, dominada dae su tonnu e dae sas retzettas de mare.

Ispostandesi in su nord de s’isula, a cara de sa costa gadduresa, si abberit s’arcipelago de sa Madalena, unu beru paradisu naturale reconnoschidu comente Parcu Natzionale. S’isula printzipale, sa Madalena, accasazzat sa bidda chi giughet su mattessi numene, cun d’unu portu istoricu e unu tzentru de carreleddas chi contant su passadu ligadu a sos marineris.

A pagos minutos de navigassione si agatat Caprera, ligada a sa memoria de Zuseppe Garibaldi, chi inoghe at passadu sos urtimos annos de sa vida sua. Caprera est puru una zura de valore mannu po s’ambiente, cun andalas chi che leant a sas plajas pitticcas e logos in sos cales sa bista che bogat s’alenu. Intre sas atteras isulas de s’arcipelago si distinghent Sant’Istevene, Santa Maria, Spargi e Razzoli, donzuna cun su carattere sou. Budelli, connoschida in tottu su mundu po sa plaja Rosa est frigura de sa dilighesa e rispettu de s’ambiente: s’intrada a dies de oe est regulada po diffendere s’ambiente.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”