Nugoro, attivu su Numeru Unicu Europeu 116117 po sas curas chi no sunt urgentes.

Est operativu fintzas in Nugoro su Numeru Unicu Europeu 116117 po s’intrada a sas curas meigas chi no sunt urgentes.Su servitziu, attivadu dae Areus est disponibbile in sa zura de s’ASL de Nugoro e ammuntat sa zura telefonica 0784. Sos tzittadinos podent cuntattare chentza pagare su numeru donzi die, 24 oras supra 24, po retzire assistentzia sanidaria chi no siat de emergentzia o po alcansare nuntzos e orientamentu supra sos servitzios socio-sanidarios fachidores in s’iscrocca.

Su 116117 apparat azzudu puru po sas proceduras ligadas a su seperu o sa revoga de su duttore de meighina generale o de su pediatra de seperu liberu. S’intentu est de faghere divennere pius simple s’appitzicu intre tzittadinos e servizios sanidarios, garantinde rispostas lestras e iscansare s’intrada chentza motivu a su prontu succursu po situatziones chi no dimandant un’interventu lestru.

Sa tzentrale operativa de su 116117 est intregada cun cussa de s’emergentzia 118, permittinde unu tramudu lestru de sa giammada in casu de netzessidade. S’attivazione de su serviziu in su Nugoresu sighit cussa giai bennida in sas ASL de s’Ozzastra e de su Sulcis Iglesiente, in d’unu percursu graduale de cabuda regionale.

Su servitziu novu interessat una zura chi accansat casi 160.000 residentes e est unu passu importante bessu su potentziamentu  de s’assistentzia de s’iscrocca e una risposta a sas dimandas de sos impittadores de sa zura. Su numeru 116117 est pensadu po rispondere a sa dimanda de curas a intensidade bassa, garantinde sa continuidade de s’assistentzia e accotzare su sistema de emergentzia-urgentzia po mesu de una retza pius balida e cordinada.

Cun custu comprimentu, su sistema sanidariu regionale, affortigat sa capatzidade propria de risposta, puntande supra novidade, atzessibilidade e agilitassione de sos caminos de cura. Unu nuntzu bellu meda po Nugoro e po sa Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22