In Villasimius, Alessandro Borghi lezet Javier Cercas, una serana istravanada a su Festival de sa Marina.

Un serana prena de emossiones cadrias isettat su pubbricu de su Festival de sa marina de Villasimius chenapura 25 de triulas, gratzias a unu fora de programma d’eccessione chi promittit de dassare su sinnu.

Supra su cataffale de sa prata pitticca affaccada supra su portu turisticu at a pigare difattis Javier Cercas, unu de sos iscrittores e sabiosos ispagnolos pius amados e tzelebrados de su mundu, po presentare s’urtimu romanzu suo,”Il folle di Dio alla fine del mondo”. S’opera at giai accollidu adduimentos meda siat dae parte de sa critiga siat de su pubbricu internatzionale.

A chistionare cun s’autore bi at essere s’iscrittore Giordano Meacci, in d’unu cunfruntu chi si anticipat prenu de ammaghios litterarios e devuccamentos supra su tribagliu de s’ iscrittore tzelebre. Ma sa serana cuat un’atteru corpu de iscena: a lezere carchi iscorriu leadu dae sas operas de Cercas at essere Alessandro Borghi, unu de sos pius cadrios attores italianos de s’ingendra sua.

Sa boghe sua at a dare corpus e anima a sa paraula iscritta, donande a su pubbricu un’esperientzia de sos sensos e de sos contos unica. Su Festival de sa Marina de Villasimius, arrivadu a sa de sette edissiones, naschet dae un’idea de Luigi Ferrara e est curadu dae Francesca Serafini. Unu festival chi at ischidu in sos annos creschere e si affirmare, battinde sa cultura in su coro de s’istiu sardu e balorizzande su portu commente cataffale nadurale po addobbios de livellu artu meda.

Su sutzessu de s’edissione 2025 est giai reale: sapadu passadu sa prata pitticca est bistada prenada po iscurtare tres zigantes de su tzinema italianu- Valeria Golino, Valeria Bruni Tedeschi e Valerio Mastrandrea, interpretes de una serana cadria e prena de passione. S’addobiu de chenapura 25 de triulas cun Javier Cercas e Alessandro Borghi si presentat duncas comente unu de sos momentos pius de signifficu de su Festival.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pranos de creschida e balorizzassione de s’iscrocca: sa Fundatzione Barumini affortigat su soberamentu intre Europa e Italia.

Sighit su caminu de sa Fundatzione Barumini pro faghere connoschere sa Marmilla fora de sas lacanas regionale e natzionales. In sas urtimas chidas custu impignu si est abberadu cun sa partecipassione a duos abbenimentos importantes dedicados a su turismu e su soberamentu de sas iscroccas. Duas esperientzias divressas ma ligadas dae su mattessi intentu chi est cussu de contare un’iscrocca ricca de istoria cultura e bista.

Su primu mamentu est bistadu in Parigi pro su Salone Mondiale de su Turismu. Su seperu de si presentare imparis at dadu prus fortza a su nuntzu e at permittidu de apparare una bisione cumprida de sa Marmilla. Intro de sos logos espositivos sas realidades ant mustradu sas particularidades printzipales de s’iscrocca. Attentzione manna est bistada posta a sos sitos archeologicos, a sa natura e su connottu locale. Su tribagliu cundivisu at fattu divennere prus balida sa presentatzione e at attiradu s’interessu de sos bisitadores e operadores de tottu su mundu.

Cussu frantzesu est difattis unu de sos abbenimentos prus importantes in Europa pro custu campu. Accorrat donz’annu unu numeru mannu de partetzipantes e est unu puntu de addobiu intre chie tribagliat in su turismu e chie chircat logos novos de bisitare. In su mentres de su Salone sa Fundatzione Barumini Sistema Cultura at presentadu una manera de biazzare prus abbizosa e prus lenta. Unu turismu chi ponet a su tzentru s’esperientzia deretta, su cuntattu cun sa nadura e s’iscoperta de sas biddas pitticas. Sunt bistados contados sos caminos, su connottu e sos logos prus pagu connoschidos chi sunt una ricchesa manna pro s’iscrocca.

S’intentu est cussu de apparare a sos bisitadores un’esperientzia bera fatta de addobios connoschentzia e partecipassione. Unu modellu chi aunit cultura ambiente e identidade locale e chi puntat supra sa calidade de s’offerta prus che supra sa cantidade de sos bisitadores. Custu caminu mustrat chi su soberamentu de s’iscrocca non podet essere dassadu a su casu ma depet essere fraigadu cun attentzione e continuidade. Sa presentzia in mustras natzionale e internatzionales azzuat a affortigare sa frigura de sa Marmilla e a la faghet divennere semper prus connoschida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22