Su MAN de Nugoro: rucrada de arte intre Sardigna, memoria e tempos de oe.
In su coro de su tzentru istoricu de Nugoro, su MAN- Museu de Arte de sa provintzia de Nugoro, est una de sas realidades culturales pius vivas e connoschidas de sa Sardigna. Fundadu in su 1999, su museu est bistadu
canale WhatsApp
In su coro de su tzentru istoricu de Nugoro, su MAN- Museu de Arte de sa provintzia de Nugoro, est una de sas realidades culturales pius vivas e connoschidas de sa Sardigna. Fundadu in su 1999, su museu est bistadu capatze de si retagliare in sos annos unu rolu de primu pianu in sa bista de s’arte moderna e de oe, gratzias a unu disignu culturale forte, abbertu e semper in creschida.
Sa collessione abbarrante de su MAN tenet casi 850 operas e documentat sa creschida de s’arte sarda dae sa fine de s’Ottighentos fintzas a sas issidas de oe. Intre sos artistas presentes si acciappant friguras tzentrales de su Noighentos de s’isula comente Antoni Ballero, Frantziscu Ciusa, Mario Delitala, Zuseppe Biasi, Carmelo Floris, Costantino Nivola, Sarbadore Fancello, Mauro Manca e Maria Lai. A costazu de issos, nomenes chi che ant leadu su diligu sardu addìa de sas laccanas regionales e natzionales, comente Giuanne Pintori, interprete de su design italianu de su pustis de sa gherra.
Una de sas propriedades chi annoditant su MAN est sa capatzidade de isposare sa balorizatzione de s’identidade culturale de s’isula, curada cun d’unu alidu internatzionale forte. Sas mustras a tempus, curadas cun rigore iscientificu mannu meda e dilighesa de su tempus de oe, fraigant pontes intre passadu e presente, intre artistas sardos e mastros mannos de s’arte mondiale, ma fintzas intre limbazos divressos, dae s’arte bisiva a su design, dae s’iscultura a sa fotograffia.
Intre sos abbenimentos pius de signifficu de sos urtimos annos risartant “Sas affinidades immazinadas”, mustra chi at tzelebradu sos 25 annos de su museu po mesu de 100 operas de sa collessione, e s’istagione espositiva “Essentzias naturales”, in sa cale artistas de oe comente Christiane Lohr, Una Szeemann e Alessandro Biggio ant meledadu supra s’appitzigu intre natura e sapire. Donzi mustra est accumpanzada dae unu programma riccu de addobios, buttegas, attividades de formatzione e pubbricatziones, chi faghent divennere su museu unu tzentru de produssione culturale e no solu de apparada.
Attività realizzata col contributo della Regione Sardegna — IMPRENTAS 2024-2025. LR 22/2018, art. 22
© RIPRODUZIONE RISERVATA
Su tenore sardu Frantiscu Demuro giughet ”Demetra” in Tzina e faghet onore a sa Sardigna.
At essere issu s’interprete mascrinu de s’opera Demetra, iscritta dae s’autore sardu Zuseppe Elia Monni, chi at essere presentada su 20 de martu in Chengdu, in Tzina.
canale WhatsApp
Su tenore sardu Frantiscu Demuro giughet ”Demetra” in Tzina e faghet onore a sa Sardigna.
Unu disignu musicale naschidu in Sardigna arribat fintzas in Tzina e biet intre sos interpretes suos unu de sos tenores prus connoschidos de s’isula. Si tratta de Frantziscu Demuro, de issida Portuturresa e oe intre sas boghes prus appretziadas de sa lirica internatzionale. At essere issu s’interprete mascrinu de s’opera Demetra, iscritta dae s’autore sardu Zuseppe Elia Monni, chi at essere presentada su 20 de martu in Chengdu, in Tzina.
Sa Regione Sardigna at seperadu Demuro pro incarnare s’isula in custu addobiu culturale importante in sa Repubblica Populare Tzinesa. Dae pagu su tenore at binchidu fintzas paritzos e importantes premios pro comente mustrat sa Sardigna fintzas in forastigu. S’initziativa puntat a faghere connoschere sa musica e sa cultura sarda in forastigu po mesu de un’ispettaculu chi aunit opera lirica e connottu populare.
Su disignu no est solu pro su teatru. S’dea est diffattis cussa de revertire Demetra fintzas in d’una serie televisiva. Propriu cust’abettu at attiradu attentzione meda in Tzina pro itte si trattat de una produssione noa chi ponet impare musica, contu e friguras. In custa dies Demuro est impignadu in su Teatru Liricu de Casteddu cun s’opera Norma de Vincenzo Bellini, inube interpretat su rolu de Pollione. Su tenore at essere in iscena in martu. Su sovrintendente de su Liricu Andria Cigni at evidentziadu sa braga bidinde Demuro seperadu pro rappresentare sa Sardigna in d’unu disignu internatzionale chi podet affortigare sos appitzicos culturales intre sos duos Paisos.
S’opera Demetra offerit una lettura nova de sos mitos de su Mediterraneu e aunit su cantu liricu cun sas calidades de su sonu de su connottu populare.S’ispettaculu lu ant a faghere fintzas a su 26 de martu e sinzat sa naschida de una manera nova de contare sos mitos po mesu de sa musica. De sicuru nde ammos intendere faeddare fra pagu fintzas in Italia.
Sa presentzia de Frantziscu Demuro in Tzina est duncas non solu unu mamentu artisticu importante, ma fintzas un’occasione po faghere connoschere in su mundu sa cultura e su connottu de sa Sardigna. Unu biazu musicale chi mustrat comente s’arte potat creare pontes intre populos attesu e che leare sa boghe de s’isula supra cataffales semper prus internatzionales.
Attività realizzata col contributo della Regione Sardegna — IMPRENTAS 2025-2026. LR 22/2018, art. 22
© RIPRODUZIONE RISERVATA
